Canadami, Northwest Territoriami, tuttut kisinneqaqqittariaqarput, taavani avatangiisinut ministeri taamatut aalajangiivoq kisitsinerit kingulliit tupaallannartut paasereerlugit.
Kisitsinerup kingorna paasineqarpoq tuttut ikileriarujussuarsimasut, canadamiut nutaarsiassaqartitsiviat CBC nalunaarpoq
Tuttut ataatsimoortut Bluenose Westimik taagorneqartut amerlassusaat assersuutigineqarpoq.
Siullermik kisitsisoqarmat 99.000 - usimapput, kisitsisoqaqqimmallu 20.800-innanngorsimapput, ikileriaat 80 procentiulluni..
Kisitsisit nutaat piniartunit aalisartunillu taavanimiunit upperineqanngillat.
Tuttut illersorneqarnissaat anguniarlugu tuttut pisassat qanoq amerlatigissanersut avatangiisinut ministerip kisitseqqittoqareerpat nalileqqikkusuppaa.
Aappaagu kisitsisoqarnissaa ilimagineqarpoq, tuttullu ataatsimoortut eqqugaasimasut illersorniarlugit iliuusissat arlallit atuutilersinneqassapput.