Canadamut timmisartuussisalernissamik pilersaaruteqannginnerarput

Canadap nunattalu akornanni timmisartuussisalernissaq pisariaqartoq, danskit Nunavummi konsuliat Kenn Harper, Nunatsiaq Newsimut oqarpoq, tusatsiakkallu naapertorlugit Air Greenlandip First Airillu akornanni oqaloqatigiinnerit aallartereersut Kenn Harperip oqaatigaa. Tamannali ilumuunngitsoq Air Greenlandip pisortaanerata Michael Binzerip oqaatigaa.
Allattoq Mads Lynge
apriilip 01-at 2008 15:15

- Canadamut timmisartuussisalernissaq siunertaralugu Canadami timmisartuutileqatigiiffimmik oqaloqateqanngilagut. Siunertaq pissanganaraluartoq tusarfigisimanagit maannangaaq erseqqissaatigiumavara, Michael Binzer oqarpoq.

Timmisartunik minnerusunik atuinikkut nunatta Canadallu akornanni timmisartuussisoqarsinnaalernissaa, danskit Nunavummi konsuliata Kenn Harperip takorloorpaa, soorlu First Airip timmisartuussisarallarneratut ingerlatsinissaq naleqquttutut nalilerlugu.

Air Greenlandilli pisortaanera allatut isumaqarpoq:

- Imminut akilersinnaasumik naammattunik Canadap nunattalu akornanni ilaasoqarsinnaanissaa ilimaginngilarput. Canada aqqutigalugu angalarusussinnaasunik peqarnersoq siornatigut misissuiffigereerparput, naammattunillu ilaasussaqanngitsoq taamani paasillugu, Michael Binzer oqarpoq.

Taamaakkaluartoq Canadap nunattalu akornanni timmisartuussisalersinnaanissaq ammaffigalugu Air Greenlandip pisortaata erseqqissaatigaa. Timmisartuussisalernissamulli atugassamik naleqquttumik timmisartussaqannginnerarpaa, ilaasussallu suli ikippallaarnerarlugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq