Canadamiut umiarsualivitsinnut matunneqassanngillat

Canadap kilisaatinut nunatsinneersunut savalimmiuneersunullu umiarsualivimminut tulaaseqqusiunnaarnerata savalimmiormiut raajarniutaanuinnaq kinguneqarpoq. Canadap umiarsualiviit siamanngormat matummagilli kilisaatit savalimmiuneersut raajartaminnik Savalimmiunut Danmarkimulluunniit tulaassiartortariaqalerput.

Kilisaataatillit peqatigiiffiat APK ippassaq kajumissaarivoq nunatsinni umiarsualiviit canadamiut aalisariutaanut matoqqullugit. Taamaliornissarli pissusissamisuussanngitsoq, Aalisanermut Naalakkerssuisoq Rasmus Frederiksen (S) oqarpoq.

-Savalimmiormiut pisassatik tamakkereerlugit aalisaqqilernerat Canadap qisuariarnerannut pissutaavoq, nunattalu raajartassani 300 tonsit pisarereermagit ajornartorsiummut akuliutinnginnissarput pingaaruteqarpoq, Rasmus Frederiksen oqarpoq.

Ajornartorsiut NAFO-p ataatsimiinnerani aaqqinneqassaguni pissusissamisoornerussasoq naalakkersuisoq isumaqarpoq.

Canadap taama iliuuseqarnera ingasattajaarluni naalagaaniarnertut Danmarkimit isigineqartoq nunanut allanut ministereqarfimmi Savalimmiunut tunngasunut siunnersorti Arni Olafson Ritzaumut oqarpoq.

Taamaattorli Canadap sakkortuuliornera inuiaat pisinnatitaaffii pillugit malittarisassani unioqqutitsinerugunanngitsoq, Arni Olafson erseqqissaavoq.