Canadamiut Tartupaluk nakkutiginialerpaat

Tartupaluk qaqumulluunniit pinnaanneqarniarunarpoq.

Canadap to milliard koruuninik aningaasaliinermigut nunat issittumiittut Canadamit oqartussaaffigineqartut qaammataasakkut ulloq unnuarlu ukiuni arfineq-marlunni nakkutigineqalernissai maanna qulakkeerniaraa, nutaarsiassaqartitsivik Ritzau allappoq.

Canadamiut avataarsualiartaatinik nakkutilliisoqarfiata MacDonald Dettwilerimut qaammataasaq atorlugu nakkutilleeqqusisimavoq. MacDonald Dettwilerip avataarsualiartaammik Radarsat 2-mik aasaru avataarsualiartitsinissani pilersaarutigaa.

Issittumi nunanik piginnittuunermik isumannaallisaanermillu tunngaveqartoq tapersersorniarlugu avataarsuanit nakkutilliinissaq ministereqarfimmit piumasarineqarsimavoq.

Canada Danmarkilu tamarmik Tartupalummik piginnittuullutik nalunaaruteqareerput. Sorsunnersuulli nillertup nalaanisut issittumi sorsuttoqarnissaa ilimanaateqanngitsoq Canadami illersornissap pilersaarusiorneqartarnerani pisortaaneq, Vincent Rigby erseqqissaavoq.

- Issittumi nunanik piginnittuuneq isumannaallisaanerlu pinerullugit nakkutilliinissaq pilersaarutaavoq, Vincent Rigby oqarpoq.