Canadamiut Nunatsinni uuliasiulerput
Nunatta kitaata avataani uuliasiorniartuni Cairn Energy kisiartaanngilaq. Canadamiut suliffeqarfiutaat Husky Energy tamassa piareersaleruttorpoq Sisimiut avataanni misileraalluni uuliasiorniarluni.
Tamanna atuarneqarsinnaavoq Qeqqata Kommuniata ataatsimiinneranit imaqarnialiami. Husky Energy 2013-mi misileraalluni qillerilersaarpoq aammalu Nunatsinnut tikeraareerput qilleriviit pilersornissaata qulakkeerneqarnissaa siunertaralugu.
Imaani sulinermi Husky Energy-mi immikkut ilisimasalik Scott Brown Sisimiut umiarsualiviata pilersuivittut atornissaanut pilerisuppoq aammali Aasiaat periarfissatut isigineqarlutik.
Cairn Energyp Qeqertarsuup avataani 2010-mi ukiormannalu qillerivianit kujasinnerusumi Husky Energy qillerilersaarpoq. Taamaammat Sisimiut umiarsualiviat Husky Energy-mut iluatinnaateqarpoq. Sisimiunili umiarsualivimmi maanna umiarsuaq angisooq ataaseq kisimi tulassimasinnaavoq. Tamanna ilaatigut pissutigalugu Qeqqata Kommuniata nukinngutilerpaat Sisimiut umiarsualiviata allilerneqarnissaa.
Cairn Energy Aasiaat umiarsualivianni annertuunik suliaqareerpoq killoqarfik taanna Qeqertarsuup tunuata kujasissuaniittoq sulisut taarserarnerannut atortussanillu timmisartut atorlugit pilersuinermuta atorneqarsimalluni.
Qeqqata Kommuniata ilisimatitsissutai malillugit Husky Energyp aamma Kangerlussuaq pilersuinermi qitiusutut atorusuppaa. Kangerlussuaq qillerivissamut qaninneruvoq Aasiannut sanilliullugu. Husky Energy-mi sulisut aamma Kangerlussuarmut tikeraarsimapput hangarit peqqumaasiviusinnaasut misissoriartorlugit.
Husky Energy oqaaseqartissinnaasimanngilarput uuliasiorneq qanoq annertutigisoq ingerlatilersaarneraat pillugu. Suliffeqarfilli Qeqqata Kommunianut ilisimatitsisimavoq 2013-mi uuliasiorlutik qilleriniarlutik.
