Canadamiut naggueqatigiit Inunnik ilisimasakippallaarput
Inuit Tapiriit Kanatami isumaqarput, Canadamiut nunanik issittunik naggueqatigiinnullu Inunnut tunngasunik ilisimasakippallaartut.
Ukiarmi nuna tamakkerlugu isumasiuisitsipput, matumani Canadamiut naggueqatigiinnik Inunnik qanoq ilisimasaqartiginerat paaserusunneqarluni.
Isumasiuinikkut paasineqarpoq Canadamiut amerlanersaasa ilisimanngikkaat, soorlu nerisassat Canadap issittortaani akisunerungaatsiaqisut aamma naggueqatigiit Inuit Canadamiut allat assigalugit akileraartartuusut.
- Kisianni Canadamiunut allanut peqataarusuppugut aamma Canadamiut allat kikkuunitsinnik paasisitsiniaanitsigut paasitikkusuppavut, Inuit Tapiriit Kanatami oqarput.
Taamaalilluni 2010-mi assigiinngitsunik aaqqissuussinernik pilersaarusiortoqarpoq, tassami ukioq 2010 naggueqatigiit Inuit ukiorissagaat, Inuit Tapiriit Kanatami aalajangiussimammassuk.
