Canadamiut ilisimasassarsiortut umiiarnikunik ujaasissapput

Umiarsuup, Martin Bergmannip, issittumi ilisimasassarsiortut 1845-mi umiiartut umiarsuaat ujaqqinniarpaa. Ukiullu tallimassaanni taama misissuisoqassaaq.

Issittumi ilisimasassarsiortut tusaamasat, tulummit John Franklinimit siulersorneqartut, 1800-kkut qiteqqunneranni umiarsuarnik Erebusimik Terrorimillu Canadap issittortaani angalapput.

Uteqqinngisaannarpulli. Umiartortut toqungasut timaat qerisut nassaarineqarput, umiarsuilli nassaarineqanngisaannarsimallutik. Franklin taamanersuarli Sullualukkut aamma aqqutissarsiortuuvoq. Umiarsuit taakku marluk Sullualummut apuutiinnarput ingerlaqqinnatilli, sikkussaasimanissaallu ilimagineqarluni.

Piniartut, sumiiffimmik ilisimannittut, ikiorsiullugit ilisimasassarsiortut qimataannik siorna nassaartoqarpoq, umiarsuilli paasisaqarfigineqaratik.

Maannalu misileeqqittoqarnialerpoq. Tamatumuuna Canadap nunamik allanngutsaaliukkamik nakkutilliisoqarfia avatangiisinullu ministeriaqarfia ilisimasassarsiornermik aqutsisuullutik.

Avatangiisinut ministeri, Leona Aglukkaq, ilisimasassarsiornermut akisussaasuusoq, oqarpoq ilisimasassarsiorneq marlunnik siunertaqartoq.

Umiarsuarnik periarfeerussanik ujarlertoqaannarani aamma ujaasinermi teknikkikkut atortorissaarutit atorneqartut atorlugit Sullualuup imartaata ilaata naqqa assiliorneqarsimanngitsoq assiliorneqassaaq. Umiarsuit ukiuni aggersuni tamaani angallannerat annertusissappat tamanna pisariaqartinneqassaaq.

Ilisimasassarsiorluni angalaneq sapaatip akunnerani matumani aallartittussaq sapaatit akunnerinik arfinilinnik sivisussuseqassaaq.