Canadamiut avannarpasinnerusuliarput

aggustip 09-at 2005 16:12

Canadamiut sakkutuut umiarsuaat alapernaarsuutit marluk Canadap avannarpasinnerusortaanut imartamut ingerlaarput, Labradori, Nunavut, Quebec aamma Manitoba tikissallugit. Sakkutuulli alapernaarsuutaat Tartupalummut tikissanngitsut, sakkutuut oqaaseqartartuat Marie Claude Gagne, Canadami nutaarsiassaqartitsivimmut Canadian Pressimut erseqqissaavoq.

Tartupaluk Canadap Danmarkillu maanna assortuussutigaat, tamarmillu oqartussaaffigalugu piginerarpaat.

Danmarkilli sakkutuuisa umiarsuaat Tulugaq Tartupalummut sapaatip-akunneri marlussuit qaangiuppata tikissaaq, Danmarkillu oqartussaanini taamaalilluni takutinniassavaa.

Statsministeri Anders Fogh Rasmussen ippassaq oqarpoq, oqartussaaffilerngusaanneq tamaanga killittariaqalersoq, taamaattumillu canadamiut, danskit kalaallillu ataatsimeeqatigiinnissaat sulissutigineqartoq.