Canadamiut aningaasaleerujussuarput, danskiunngitsulli!
Nunat issittut pillugit ukiorititami, Canadamiut 800 mio. koruuninik aningaasaliiniartut, danskit taama tukkortiginngillat. IA sinnerlugu danskit inatsisartuinut ilaarsortap Kuupik Kleist-ip oktobarimi siunnersuutigigaluarpaa aappaagumut, ukiunullu tulliuttunut 100 mio. koruuninik aningaasaliiffigineqarnissaa.
Soorluliuna aningaasaqarnermut inatsisissami oqallinnermi statsminister Anders Fogh Rasmussenip siunnersuut tusaanngitsuusaaraa. Tunngavilersuutigaa ilinniarnermut ilisimatusarnermullu tapiissutinut, danskit naalagaaffiata ukiumut tapiisarnerinut, Namminersornerullutik Oqartussat akisussaaffeqarfiannut tunngassuteqartoq, isumaqarlunilu nunatta naalakkersuisuisa aningaasat sumut atornissaasa aalajangernissaat tulleriinnilersortariaqaraat.
Taamaakkaluartoq aningaasaqarnermut ministerip Thor Pedersenip Issittumi Pissutsinut Ukiorititaasumut suliniutinut ilangiivoq. Ukiunimi naatsorsuiffiusuni 2007-imi 2008-milu naalakkersuisut, Dansk Folkepartiillu isumaqatigiissuteqarnerisigut ukiumut tapiissutigineqartartut 30 millioni koruunit saniasigut 16 millioninik tapiissuteqarfiginissaa akuersaarpaat.
