Canadamiut Amerika avannaqqullugu immakkut aqqutikkuulerput

Amerika avannaqqullugu immakkut aqqut Canadamiut sakkutuuinit ukiorpassuarni angallavigineqarsimanani, qaammatip tulliani angallaviginiarneqalerpoq.

Sakkutuut nunamiut, imarsiortut timmisartortartullu alapernaarsuinerminni angallavigissavaat Amerikap avannaa, kitaanit kangimut Lancaster Sound tikillugu. Sakkutuut umiarsuaat HMCS Montreal, alapernaarsuutit marluk aamma timmisartut arfinillit atorlugit aggustip aqqaneq-aappaanniit 24-ianut angalassapput, katillugit 400-nik inuttallit.

Alaatsinaatsut oqarput, ukiuni kingullerni 30-ni aatsaat taama atsigisumik, taamalu avannarpasitsigisumi sakkutuut peqataaffigisaannik iliuuseqartoqalersoq.

Canadami nunanut allanut ministeri Peter Mckay oqarpoq, sakkutuut imartaq tamaat angallavigisinnaassaneraat paasissallugu pisariaqalivissoq, pingaartumik eqqarsaatigalugu silaannaap kiatsikkiartornerata kingunerisaanik issittumi sikuujuaannartup aakkiartorneranik nalunaarutit. Ministerip aarleqqutigaa nunami allamiut umiarsuaat imartami tassani angalasalernissaat.

- Imartaq angallavigissallugu suli navianartorujussuuvoq, MacKay oqarpoq.