Canadamiut akerliussutsimik takutitsipput

Nunap inuiisa meerartaasa 40-kkunni 50-ikkunilu akuersaarneqarsinnaanngitsumik misileraavigineqartarsimanerat pillugu paasissutissanik qulaajaasoqareersorlu, Canadami illoqarfippassuarni sapaatit akunnerani kingullermi akerliussutsimik takutitsisoqarpoq. Misileraanerit pineqartut Canadap naalagaaffianit aamma aningaasalersugaasimapput.
Allattoq Simon Uldum
juulip 26-at 2013 08:45

Canadami naalakkersuisut ilisimatuui 40-kkunni 50-ikkunilu indianerit inuillu meerartaat atuariartortitat misileraaffigisarsimavaat. Meeqqat ilaat piaaraluni nerisakilliortinneqartarsimapput, allallu peqqinnartunik vitamineqarluartunillu nerisaqartinneqartarsimallutik. Meeqqat peqqissusaannut qanoq sunniuteqarnerata misissuinermi siunertaasimavoq. Meerarpassuilli misileraaffigineqartut misileraaffigineqarnertik toqqutigisimavaat.

Paasissutissat saqqummiunneqartut kamaatigineqartupilussuupput, nunalu tamakkerlugu akerliussutsimik takutitsinernik maanna kinguneqarlutik.

Qilaatersortoqarluni erinarsortoqarpoq, aamma allagartarsualisaarput ima allassimasunik: "Ministeriunerup Harperip utoqqatsernini pimooruttariaqarpaa".

Harper, ilungersortumik pisortatigoortumillu Canadap inatsisartuini ukiut tallimat matuma siorna utoqqatserpoq, nunap inuiisa siuttui inatsisartullu saallugit oqarluni: "meerarpassuit paarilluarsimasinnaannginneri ullumikkut utoqqatsissutigaarput."

Pissutsit allaanerulernissaannik pitsanngorsarneqarnissaannillu aamma neriorsuuteqarpoq. Taamanilu oqaatigisaminik pimoorussinissaa akerliussutsimik takutitsisut maanna piumasaraat.

Atuarfiit pillugit paasissutissarpassuit suli isertuunneqartut naalakkersuisunit saqqummiunneqarnissaat Indianerit Inuillu aamma piumasaqaatigaat. Allagaaterpassuimmi taakku misileraanerit akuersaarneqarsinnaanngitsut saniatigut aamma qanga kanngunartuliaasarsimasunik allanik ersersitsinissaat ilimagineqarpoq.

Canadami indianerit høvdingiunerat, Shawn Atleo, oqarpoq, oqaluttuarisaaneq pillugu unneqqarissuunissamut piffissanngortoq. Taanna qanittukkut oqarpoq "Oqaluttuarisaanerput allanngortissinnaanngilarput, siunissarli pitsaanerusoq naapertuilluarfiusorlu suleqatigiissutigisinnaavarput".