Canadamit puisit amiinik pisisarneq unitsilli!
Naalakkersuisut ullumi ataatsimiinnerminni aalajangerpaat, Great Greenland A/S-ip Canadamiit puisit amiinik pisisarnini unitsissagaa.
- Puisit amiinik tunisassiortarnermini kalaallit piniartut puisinik piniariaasiat naapertorlugu puisit pisarineqartut amii Great Grenlandip tunngavigisariaqarpaa, soorlu tamanna aamma qangaaniilli taamaattuarsimasoq, Naalakkersuisut siulittaasuat, Hans Enoksen, tusagassiuutitigut allappoq.
Anaaleraluni puisinniarneq Kalaallit Nunaanni atorneqanngisaannarpoq, kalaallillu kulturiannut ilaanngisaannarsimalluni.
- Taama piniartarneq akuerineqarsinnaanngilluinnarpoq, Naalakkersuisut siulittaasuat, Hans Enoksen, oqarpoq.
Canadamiut puisit piaraannik qiviuerneqanngitsunik anaalerlugit piniartarnerat Uumasunut Illersuiniaqatigiiffinnit 1980-ikkunni sakkortuumik assuarlerneqartarpoq.
Assuarlerneq taanna peqqutigalugu Kalaallit Nunaata puisit amiinik avammut niuernera ajutoorujussuarpoq piniartullu aningaasarsiornikkut eqqornerlunneqarlutik.
Taama pisoqaqqeqqunagu puisit amiinik Canadaminngaaneersunik pisisarneq Naalakkersuisut unitseqquvaat.
Piniarnermut Aalisarnermullu Pisortaqarfimmi pisortaq, Amalie Jessen, ippassaq unnukkut kingusissukkut nalunaaraluarpoq, ammeriviup ukiuni kingullerni marlunni ataatsimiittarnerini Naalakkersuisut oqartarsimasut, canadamiut amiutaannik pisisarneq kalaallinut inuutissarsiutigalugu piniartunut akornutaanngippat, canadamiut puisit amiutaannik pisisarneq Naalakkersuisut ajornartorsiutiginnikkaat.
Naalakkersuisulli ullumi ataatsimiinneranni isuma tamanna tassa allanngorsimagunarpoq.
Ammeriviup pisortaanera, Michael Nielsen, Naalakkersuisut aalajangernerannut tunngatillugu oqaaseqartinniarlugu pissarsiariniaraluaratsigu iluatsinngilarput. Taamaattorli Great Greenlandimi siulersuisut siulittaasuat, Anders Brøns, Radioaviisimut oqarpoq, piginnittut taama isumaqarpata, Naalakkersuisut kissaataat Great Greenlandimit malinneqarumaartoq.
