Ulluni makkunani Canadap sineriaani puiseeqqat piniarneqaleruttorput. Uumasunik illersuiniaatigiiffiit puisit amiinik sulianik piseqqusinnginnerat tunullugit, danskit puisit amiinik atukkersorput, ilaatigut Great Greenlandimit suliarineqarsimasunit.
Kalaallit Nunaat Danmarkilu puiseeqqat amiinik eqqussuinerpaanut ilaapput, puiseeqqallu avaartarneqarlutillu qalugissamik toqunneqartarput. Taama nipeqartumik nutaarsiassaqartitsivik Ritzau tusarliussivoq.
Puiseeqqat 300.000-t Canadap kangimut sineriaani Newfoundlandimi ulluni makkunani toqorarneqaleruttorput, danskillu uumasunik illersuiniaqatigiiffiisa oqariartuutaat tunullugit puisit amiinik atukkersorput.
Piniarnermut pisortaqarfimmi allaffimmi pisortap, Ole Heinrichip, ilimaginngilaa puisit amiinik sulianik piseqqusinnginneq Great Greenlandimut akornutaassasoq.
Great Greenlandip nammineq akilersinnaasumik puisit amiinik tunisassiussappat, puisit amii ikinnerpaamik 120.000-t ukiumut tunisassiarisariaqassavai.
Ole Heinrichip oqaatigaa Great Greenlandip nioqqutissiornera malinnaavigilluinnaritsik, puiseeqqallu ukiuleereersimasut amii pisiarineqartanerarpaattaaq.
- Ilisimaaraarput puiseeqqat aallaammik aallaaneqarlutik pisarineqartartut, avaartaammillu qalugissamillu toqunneqarneq ajortut, soorlu nutaarsiassaqartitsivik Ritzau taama tusarliisoq, Ole Heinrich oqarpoq.
Ilisimatitsissutigaalu puisit amii Great Greenlandip Canadami Newfoundlandimeersut pisiarisartagai aataajusut.
Piniarnermut pisortaqarfimmiit oqaatigineqarpoq puisit amiinik tunisassiorneq ukiuni kingullerni annikilliartortoq, tamannali Great Greenlandip tungaaninngaanniit ilumuunnginnerarneqarpoq. Great Greenlandimi aningaasaqarnermut pisortaq Jaaku Abelsen oqarpoq puisit amiinik tunisassiorneq ukiuni kingullerni pingasuni annertusiartuinnarsimasoq, ukioq mannalu annikinnerunavianngitsoq.
2002-mi puisit amii 61.500-t tunisassiarineqarsimapput, siornalu 82.000-inngorsimallutik.
Upernavimmiit Tasiilamiillu puisit amiinik 2003-mi tunisassiornerup ammaaffigineqarnerata kingorna, tunisassiorneq annertusisimavoq. Ukioq manna kvartalit siullersaanni tunisat, 2004-mut naleqqiullugit annertunerusimapput.
