Canadami uumasut napparsimapput

Ukiut qulit ingerlanerini uumasut nappaatillit amerliartorsimasut, Nunavummi piniartut nalunaarutigaat.

Pinngortitaq pillugu nunarsuaq tamakkerlugu suliniaqatigiiffimmit, WWF-imit, Trent Universitymiillu Canadami piniartut apeqqarissaarfigineqarsimapput, apersuisimanerlu aallaavialugu nalunaarut saqqummersinneqarpoq.

Nalunaarusiami atuarneqarsinnaavoq Issittumi uumasut nappaatillit amerliartuinnartut.

Piniartut nalunaarput pingaartumik tuttut naggussamikkut pullatsitsisut siumorneqartalersimasut. Bakteerissat nappaateqalersitsisutut pasineqarput. Nalunaarusiortut isumaqarput uumasut ajoqutaasa nalaat nerinaveersaarneqassasut, neqillu ajoquteqanngitsortaa peqqissaartumik passunneqassasoq.

Piniartut ilanngullugu nalunaarutigaat eqqumiitsunik allanik naammattuuisarsimallutik. Tuttut tunnuisallutik, tingummikkut neqimikkullu qaqortunik milaarasaartarput.

Aalisakkat immamilu uumasut miluumasut nappaatillit nassaassaasut nalunaarummi aamma taakkartorneqarpoq. Canadami piniartut naapertorlugit eqaluit natsiillu tingummikkut qaqortumik milarasaartut aamma nassaassaapput. Natsit amii ajoquteqarnerulersimasut ilanngullugu nalunaarutigineqarpoq.

Qilalukkat eqaluillu ikeqalersimasut akulikinnerujartuinnartumik piniartunit pisarineqartalersimasut aamma oqaatigineqarpoq.