Canadami uuliap aqqutissaa assortuussutaasoq

Nunap immikkoortuani sioqqanit orsuummik akoqarluartunit uuliamik annertuumik qalluisoqarpoq, nunalli immikkoortua nunap timaaniippoq ungasissumi umiarsualivimmullu attaveqarani.
 
Taamaammat uuliap taama annertutigisup nunarsuarmi niuerfinnut assartorniarnera ajornartorsiutaavoq. Maannakkorpiaq qimuttuitsut lastbiilillu atorlugit assartuisoqarpoq, assartueriaatsilli taakku pisariullutillu akisupput.
 
Taamaammat Albertami politikerit sinerissamut ingerlaartumik ruujoriliisoqarnissaa kissaatigaat. Ruujorersuaq Northern Gatewayimik taaguuteqartoq Manerassuarmut ingerlaartinniartoq suli sanaartoqanngilaq indianerillu akerliussutsimik takutitsinerpassui pissutigalugit immaqa piviusunngornaviarani.
 
Taassunga taarsiullugu ingerlatseqatigiiffik Trans Canada Ontariokkoortumik Quebecikkoortumillu Atlantikup imartaata tungaanut ruujoriliinissamik pilersaaruteqarpoq.
 
Quebecimilu St. Lawrencep kuussuata eqqaani Cacounami umiarsuit usigiartarfissaannik sanaartortoqalereersimalluni.
 
Sanaartortoqarnerali sapaatit akunnerani uani unitsinneqarpoq, Canadamiut naalakkersuisuisa nalunaarusiaanni nutaami ersermat umiarsuit uuliamik assartuuterpassuit sumiiffimmi qilalukkanik akornusersuivallaassasut.  
 
Qilalukkat qaqortat ikiliartoreerput nungutaanissamullu aarlerinartorsiortinneqartutut nalilerneqarsimallutik.
 
Taamaammat uuliamik assartuinermik suliffeqarfik Trans Canada aviisi Globe and Mail naapertorlugu umiarsualiviup allami inissisimaffissaanik maanna ujaasilluni aallartissimavoq.