Canadami ukioq 2014
Allat nuannernerulaartut tassaallutik, ICC-p Inuuvimmi ataatsimeersuarnera, Canadamiunit Issittumi Siunnersuisoqatigiit siulittaasuuffiata 2013-miit akisussaaffigineqalernerata kingunernik aalajangiussassat pingaaruteqarluartut minnerunngitsumillu Qalasersuup naalagaaffinnit arlalinni pilerngunneqarneranut tunngasut oqaluttuat.
Qalasersuup Nunattalu akornanni immap naqqatigut taakku attaveqarneri ilisimatuussutsikkut misissorneqareerlutik, danskit kalaallillu naalakkersuisuisa piginnittussaatitaanermut qinnuteqaat, Naalagaaffiit Peqatigiinnut nassiutereerpaat, taamatullu aamma Canadamit Ruslandimiillu qinnuteqaatit nassiunneqareerlutik. Tamassumunnga pissutaanerusoq tassavoq, ilisimatuunit ilimagineqarmat, Qalersersuup tungaanut imartami pisuussutit assigiinngitsut arlallit tamaaniissangatinneqarneri.
Qalasersusalerngusaannerli politikikkut eqqissisimasumik maannamut oqalliffiugallarpoq.
Meeqqat inuusuttullu kaattut
Canadap inoqqaavinut ukioq 2014 arlalitsigut ilungersunartorsiorfiuvoq. Tassa Canadami Inuit inuuniarneri pillugit nalunaarusiami ilaatigut saqqummiunneqarpoq, meeqqat inuusuttullu 25-it ataallugit ukiullit ullut tamaasa nerisassaqarneq ajortut taamaattumillu kaattartut allaaserineqarluni.
Nalunaarusiap saqqummiunneqarneranut atatillugu, videomik assilisaq saqqummiunneqarpoq. Tassani takuneqarsinnaalluni angut utoqqaq nunarfimmi, Kangerlinermi eqqaavissiortoq, tassani nerisassaasinnaasunik ujarlertoq takutinneqarluni. Tamannarpiarlu ilaatigut pissutigalugu, Naalagaaffiit Peqatigiinniit Canada peqquneqarpoq, Inuit akornanni kaattoqartarnera qanoq iliuuseqarfigineqartariaqartoq, ukiullu 2014-p naannginnerani tamanna atugaajunnaarsinneqartariaqartoq piumasaqaatigalugu. Ajoraluartumilli ukioq nutaaq aallartippoq tamanna suli qanoq iliuuseqarfigineqarani.
ICC-p ataatsimeersuarnera
Canadamili ajortuinnarnik ukioq 2014 pisoqarfiunngilaq. Tassa ICC illoqarfimmi Inuuvimmi, Canadap avannamut kitaaniittumi aasaq ataatsimeersuarpoq. ICC-p præsidentia, Aqqaluk Lynge ataatsermeersuarnermi tuniarmat, Canadami illoqarfimmi Eqalunni peroriartorsimasumit, Okalik Eegeesiammit taarserneqarpoq.
Taassuma suliassaasa ilaatigut pingaarnersaraa, ICC-p siulersuisuunerisa tunuartut suliakkiutitut peqqussutaat ukiullu sisamat tulliuttut qaangiutsinnagit naammassineqarsimasussaq tassa, Issittumi Inuit eqqarsartaatsikkut timikkullu peqqissuunissaannik suliassaq taamatullu tamassuma misissuiffigineqarnissaa. Tamassuma suliarineqarnerani Naalagaaffiit Peqatigiit Peqqissuseq pillugu suliniaqatigiiffia, WHO suleqatigeqqissaarneqassasoq siunnersuutaalluni.
Issittumi Siunnersuisoqatigiinni siulittaasuuneq Canadamit 2013-mi tiguneqarmat, suliassat pingaarnersaraat EU-p Issittumi Siunnersuisoqatigiinni alaatsinaatsutut ilaarsortanngornissaa, tamannalu suliaq naammassineqarsimassaaq, USA-p siulittaasuuffik upernaaru tigunnginnerani.
