Canadami UFO-rsiortut imaaginnavissut
Canadap silaannartaani UFO-rpassuaqarpoq. Timmisullu suussuserneqanngitsut amerlangaarmata ukiuni 30-ini kingullerni takuneqarsimasuni 2015-imi takuneqarsimasut amerlanerpaat tullerilerpaat.
Allattoq Ritzau
apriilip 14-at 2016 06:19
Nutserisoq Connie Fontain
Canadian UFO Survey ukiumoortumik nalunaarusiamini taama nalunaarpoq. UFO-nik takunninnerit ullormut pingasut sisamaasarput, tassa katillugit ukiumut 1267-it missaanni.
Ukiuni 30-ini takusaqartarnerni 2012-imi takuneqarsimasut amerlapaapput, tassanimi 1981-it takuneqarsimapput. Uanilu eqqarsaatigineqarsinnaavoq nunarsuup ulluisa naggatissaattut mayat qaammatisiutitoqaanni ukioq taanna nalunaarutigineqarsimammat.
Takunninnerillu tamakku ilaatigut qaamanernik eqqumiitsunik allanillu eqqumiissinnaasunik silaannarsuarmi takunninnerupput. Amerlanerilli pissusissamisoortunik nassuiaatissaqartartut, peqatigiiffik nalunaarpoq. 2015-imilu takunninnerpassuarniit 12 procentit ataallugit amerlassuseqartut nassuiaatissaqartinneqanngillat.
/ritzau/
