Canadami torlussortartut qilaatersortartullu nersornaaserneqartut

Issittumi nersornaasiunneqartartoq, The Arctic Inspiration Prize, suliniutinut immikkut ittunut Inuit nunaannut iluaqutaasussanut tunniunneqarput.
Nersornaat anneq 5 millionit koruuninik nalillit suliniummut Imaa Iqaluit-mik taaguutilimmut tunniunneqarput, taanna meeqqanut inuusuttunullu nipilersorneq aqqutigalugu ineriartortitsinermik atuartitsiffiuvoq. Assi © : Ansgar Walk, via Wikimedia Commons
Allattoq Marianne Stenbæk, Montreal, Canada
februaarip 27-at 2021 18:30

Nersornaat sapaatit akunnerata siuliani persuarsiutigineqarluni tunniunneqarpoq.

Issittumi nersornaasiunneqartartoq Inuit Nunaanni immikkut ajunngitsumik siunertaqartumik sumiiffinni suliniuteqarsimasunut 2015-imiilli ukiut tamaasa tunniunneqartarpoq.

Ukioq manna suliniutinut arfineq marlunnut 15 millionit koruunnit agguaanneqartut, CBC News allappoq.

Nersornaat anneq 5 millionit koruuninik nalillit suliniummut Imaa Iqaluit-mik taaguutilimmut tunniunneqarput, taanna meeqqanut inuusuttunullu nipilersorneq aqqutigalugu ineriartortitsinermik atuartitsiffiuvoq.

Inuit Nunaanni meeqqat inuusuttullu ilaatigut arfinilinnik ukiullit kulturimut attuumassusilimmik nipilersortartunngorsinnaapput. Soorlu torlussornermik tivanermik nipilersornermilluunniit.

Nersornaatip annerup tullia 2 millionit koruuninik nalilik, nunaqarfimmi Nunavuup qeqqaniittumi Taloyoakimi piniartunut aalisartunullu tunniunneqarput, taakku suliniummut Niqihaqutimut tassa nerisanut atorneqassallutik.

Nerisassaqarnikkut ajornartorsiornermut, angerlarsimaffeqanngitsunut Inuillu ileqquat nukittorsarniarlugu suliniut siunertaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq