Canadami timmisartuutileqatigiiffiit marluk kattunneqartut

Canadami naggueqatigiit Inuit Inuvialluillu timmisartuutileqatigiiffii annerit marluk First Air aamma Canadian North kattunneqarput, timmisartuutileqatigiiffillu Canadian Northimik ateqalissaaq.
Assi © : Douglas Sprott/Flickr Creative Commons
Allattoq Mads Lynge
oktobarip 03-at 2018 10:27

Nunatsiaq Newsip nittartagaani tamanna atuarneqarsinnaavoq.

First Airip, Nunavimmi Makivik Corporationimit pigineqartup, Canadian Northillu, Inuvialuit Regional Corporationimit pigineqartup, kattunneqarnissamut isumaqatigiissut septembarip ulluisa 28-anni atsioqatigiissutigaat.

- Tamanna qangali sulissutigineqarpoq, Makivik Corporationip præsidentia Charlie Watt, Makivik Corporationip First Airimik 1990-imi pisineranik isumaginnittoq oqarpoq.

- Maanna piviusunngorpoq. Canadap Issittortaani silaannakkut angallassineq siuttuuffigilerusupparput, tamannalu maanna pivisunngorpoq, Charlie Watt oqarpoq.

Inuvialuit Regional Corporationip siuttuata Duane Smithip, First Airip Canadian Northillu kattunneqarnerat, naggueqatigiit Inuit Inuvialuillu aningaasarsiornerisa nukittorsarneqarnerattut taavaa.

Canadap Issittortaani timmisartuutileqatigiiffik nutaaq Canadian Northimik tassa taaguuteqassaaq, qitiusumillu allattoqarfia Ottawami inissisimassalluni.