Assi: Håkan Dahlström/Flickr Creative Commons

Canadami suliatigut peqatigiiffiup raajarniarnerup unitsinneqarnissaa innersuussutigigaa

Canadami suliffeqarfik Quin-Sea Fisheries, raajanik saattuanillu annerusumik tunisassiortoq, Royal Greenlandimit aningaasaliiffigineqalerpoq, raajarniarnerulli unitsinneqarnissaa suliatigut peqatigiiffiup innersuussutigimmagu tamanna Royal Greenlandimut kinguneqarnerlussinnaavoq.

Newfoundlandimmi avannamut kangimut sineriaani Paggivittallu kujammut sineriaata imartaani raajaqassuseq pitsaavallaanngilaq, tassa Quin-Sea Fisheriesip pingaarnertut raajarniartarfiini raajat nungulerunartut suliatigut peqatigiiffiup kisitsisaataasa takutippaat, tamaanilu raajarniartarnerup unitsinneqarnissaa innersuussutigineqarluni.

Quin-Sea Fisheriesip raajat saattuallu ukiumut 11.000 tonsit tunisassiarisarpai, pisarisartakkamilu amerlanersaat aqutsiveqarfimmi pineqartumi pisarisarpai. Aviisi AG ippassaq pingasunngornermi saqqummersoq taama allaaserisaqarpoq.

Aamma atuaruk Royal Greenlandip raajanik tunisai amerliartortut

Raajaqassuseq ukiup kingulliup ingerlanerani 40 procentinik appariarsimasoq tamaani aalisarnermut naalakkersuisoqarfiup kisitsisaataasa takutippaat. Aalisarnermik suliallit oqaaseqartartuat sulisut kattuffiata piumasaqaataa tupigusuutigingaarpaa:

- Ilisimatuussutsikkut innersuussutit tigusimalerutsigik aatsaat aalisarnerup suulluunniit iluani ileqquuvoq piffissami tullermi allanngortitsineq ingerlanneqartartoq. Ernergluniunngitsoq, Bruce Chapmann, raajanik tunisassiortut kattuffianneersoq AG-mut oqarpoq,

Raajaqassuseq pillugu sukumiinerusumik marsip ingerlanerani nalunaarusiortoqarumaartoq CBC Newsip aamma allaaseraa.

Royal Greenlandip Quin-Sea Fisheriesimik aningaasaliinini ajunngilluinnartutut isigiuarsinnarpaa, Royal Greenlandimi naapertorlugu Quin-Sea Fisheriesip raajanik tunisassiornera saattuanik tunisassiorneratut annertutigimmat suliffeqarfimmik taassuminnga aningaasaliinissaq imminut akilersinnaavoq.

Aamma atuaruk Royal Greenlandip Canadami suliffeqarfik pisiarigaa

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat