Canadami sakkutuut 800-t sinnerlugit Issittumi sungiusarput
Canadap immikkoortortaani Ontariomi sakkutuut 350-it naggueqatigiinnit inunnit nammineq piumassutsiminnik ikiuisartunit, Inuit Rangerinit taaguteqartunit, Nunavummi tamarmi ikiuisartuusunit ilitsorneqassapput.
Sungiusarneq aqutsisoqarfimmit Trillium-imik taaguuteqartumi Rankin Inletimi, imaluunniit Kangiqliniq-mi qullersaqartinneqarpoq.
Aputilimmi sikumilu inuuniarnermik apummillu illunnguusiornermik Inuit Rangerinit ilitsersuussipput.
Sakkutuut aamma qamuteralannik angalaneq issittumilu sumiissusersiorneq ilinniarpaat.
Taamaammat sakkutuut sungiusaatigalugu qamuteralallutik Nunavumi nunaqarfinni avinngarusimasuni, annerusumik piniarnermik aalisarnermillu inuussuteqartut tikittarpaat. Kangiqliniq-miut tikilluaqqusinerat qutsatigalugu sakkutuut katerisimaartitsipput. CBC News taama allaaserisaqarpoq.
Nunap immikkoortortaani Manitobami, Nunavumi Kugaaruk-mut ungasinngitsumi sakkutuut 500-t missaanniittut sungiusarneranni naggueqatigiit Inuit aamma ikiuupput.
Sungiusarnerit tamarmik sapaatip akunnerinik marlunnik sivisussuseqartut sapaatip akunnerata tulliani naammassissapput.
Canadami issittoq pillugu immikkut ilisimasaqartut sakkutuut sungiusarnerat assigiinngitsunik isumaqarfigaat.
Issittumi sakkutuunik akersuuttoqalissagaluarpat Canadami upalungaarsimatitat Ruslandip maannakkut upalungaarsimatitaanut sanilliullugit ikippallaarnerarneqarput.
Naak Issittumi uuliamik gassimillu nassaassaqarunaraluartoq Issittumi sorsuuttoqalivinnissaa amerlanerpaanit ilimagineqanngilluinnarpoq. Danmarkip Canadallu akornanni assortuussutaasoq tassatuaavoq Tartupaluk…taannalu torersumik isumasioqatigiinnikkut aaqqiissuteqartinneqassagunarluni.
