Canadami qinersinermut inatsisissat eqqornerluisinnaapput
Canadap issittortaata kippasinnerusortaa sinnerlugu inatsisartuni ilaasortaq Dennis Bevington CBC Northimut taama oqarpoq.
Qinersinermi peqquserlunniartarneq akiorniarlugu qinersinermut inatsisit allanngortinniarneqarput, uppernarsaatit assitallit adressimillu allattorsimaffillit pinngitsooratik atorneqartalernissaat Canadami oqartussanit siunnersuutigineqarmat. Tamannali ajornartorsiutitaqarsinnaassasoq, inatsisartunut ilaasortap Dennis Bevingtonip oqaatigaa, Canadap issittortaani najugallit amerlasuut adressemik allattorsimasuuteqarneq ajornerat ilaatigut tikkuarlugu.
- Qinersisartoq ukiut 50-it kingulliit ingerlanerini qinersisartuusimasoq, qinersisitsisunillu ilisimaneqarluartoq, iluamik uppernarsaateqanngikkuni qinersisinnaajunnaassaaq. Tamanna ajuusarnassaqaaq, Bevington oqarpoq.
Inatsisit allanngortinneqarpata Northwest Territoriami qinersisartut sisamararterutaat, Nunavummilu qinersisartut amerlanerit eqqornerlunneqarsinnaassapput, Canadamilu qinersisarnut aqutsisut qullersaat Marc Mayrand neriorsuivoq avinngarusimanerusuni najugallit eqqorneqarnerlunnginnissaat pinerullugu inatsisit nutaat qimerluualaarneqartariaqartut.
