Canadami qineqqusaarutit imaaginnavipput
Konservativit partiiat maajip aappaani qinersisoqarpat ajugaarusulluinnarpoq, taammaasillunilu Canadap issittortaani qanoq iliuusaasinnaasunik qineqqusaaruteqaleruttorluni. Konservativit partiiata ukiuni kingullerni ersissinniartuarpaa Canadap issittortaa Canadamit pigineqartoq, taamaassilluni Canadap issittortaata imartaani asuli Canadamiuunngitsunit aalisartoqassanngitsoq, taamatullu aamma Canadamit akuersissummik peqaqqaarani aatsitassanik piiaasoqassanngitsoq.
Canadap issittortaata sineriaa isorartoqaaq, taamaammat aamma sineriassuarmi nunarsuarmi isorartunersaasumi sakkutuunik timmisartut umiarsuillu alapernaarsuutit atorlugit nakkutilliisoqarneq aningaasatigut naleqangaatsiartussaassalluni. Taamaakkaluartoq Canadap issittortaani sillimanissamut upalungaarsimasussat amerlanerulernissaat Canadami premierministerip Stephen Harperip qineqqusaarutigaa.
Inunnik Canadamut anngiortumik eqqussisarneq, ilaatigut issittup imartaa aqqutigalugu nunamut isaasartut amerliartuinnarnerat aamma unitsinniarneqarpoq. Unitsissagaanni sakkutuut sinerissamik nakkutilliisut amerlanerulersinnissaat qineqqusaarutaavortaaq. Canadami Montrealimiit Marianne Stenbæk taama ilanngutassiivoq.
