Canadami qimuttuitsut ajutoornerini inuit 13-it maannamut ajunaarsimapput

Canadami nunap immikkoortuani Quebecimi illoqarfeeqqat ilaanni qimuttuitsut uuliamik akuiagaanngitsumik usisut sapaatit akunnerata naanerani illinernit pillukartoorlutik qaartoorujussuarmata, inuit ikinnerpaamik 13-it maannamut ajunaarsimapput.
Allattoq Simon Uldum -
juulip 09-at 2013 04:51

Ajutoorneq Lac-Méganticimi arfininngormat pivoq, qaartornerullu kingunerisaanik ikuallattoqarnera qatserisartunit ulloq unnuarlu qatserneqarluni, qaartoornermi illoqarfiup qiterpasissortaani illut arlaqartut suujunnaarsinneqarput. Inneq illoqarfimmit kilometerinik 50-inik ungasitsigisumi takuneqarsinnaasimavoq.

Qimuttuitsunik ajunaarnersuaqarnerani inuit katillugit 50-it ajunaarsimanissaat politiinit ilimagineqarpoq. Qaartorneq pimmat, illoqarfeerarmiorpassuit imerniartarfimmi nuannarineqarluartumi Musi-Cafemiissimapput - taannalu maanna nunguilluni ikuallassimavoq.

Ajutoornermut suna pissutaarpiarnersoq suli paasineqanngilaq.

Ajunaarnersuarli qimuttuitsut uuliamik useqarlutik Canadami inuppassualikkoortarneri pillugit oqallinnermik aallartitsivoq.

Qimuttuitsut uuliamik akuigaanngitsumik usisaat Lac Méganticimi tatsinut kuussuarnullu maanna kuuppoq.

Oqartussaasut saliisoqarnerata nalaali illoqarfeeqqami innuttaasut pingajorarterutaat 2000-t missaanniittut qimagussortinniarlugit pilersaarutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq