Canadami qillerilernissat uatsilaaq

Cairn Energy maani Nunatsinni Qeqertarsuup Diskop kitaani uuliamik ujaasilluni qillerileruttortoq, uuliasioqatigiiffik Chevron Canada, Ualerngup Tarajuata ilaani, tassa Beaufort Havet-p ilaani, uuliasiorluni qillerinissamut akuersissummik pissarsivoq.
Allattoq Elisa Isaksen
aggustip 09-at 2010 06:10

Uuliasiortitseqatigiiffik taanna qillerinissaminut, ukiuni qulingiluani atuuttussamik 500 millionit koruuninik akiliuteqarpoq.

Canadami nunap immikkoortuinut avannarlernut ministereqarfiup sapaatip-akunnerani matumani nalunaarutigaa, Chevron Canada Ualerngup Tarajuata, Beaufort Havet-p ilarujussuarni uuliamik gassimillu ujaasinissamut akuersissuteqarfigineqartoq, CBC-mit nalunaarutigineqarpoq.

Akuersissut Chevronimut maanna tunniunneqartoq 205.000 hektarit missinginik annertussuseqartoq, nunap immikkoortuata Yukonip avannaata sineriaata avataani immap naqqaniippoq.

Taamaattorli akuersissut tunngavigalugu Chevron maanna piffissamiluunniit aggersumi qillerilluni aallartinnavianngilaq, tassami Mexicop kangerliumanersuani ajutoornerup kinguneranik Canadami immami uuliasiorluni qillerinerni malittarisassat nutarterniarneqarmata.

Misissuinissamut akuersissut, ukiuni qulingiluani atuuttussaq pissarsiarisinnaajumallugu Chevron 500 millionit koruunit sinnilaarlugit akiliisariaqarsimavoq, taamaattorli ukiut tulliuttut tallimat ingerlaneranni misissueqqissaarnissamut pisussaaffilerneqarluni.

Canadami ilanngutassiortutta Marianne Stenbækip taama nutaarsiassaqartippaatigut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq