Canadami qatanngutigiinniat oqaluffiat ukiunik 241-nngortorsiortoq

Qatanngutigiinnianeersut siulliit Paggivittamut tikittut naggueqatigiit Inunnit toqutaapput. Jens Havenili 1764-imi tikippoq. Taanna nunatsinni ukiuni sisamani najugaqareerluni, kalaallisullu oqalussinnaanngorsimalluni Paggivittamut ingerlaqqippoq.

Jens Havenip kalaallisut oqalussinnaanini pissutigalugu Paggivittami naggueqatigiit Inunnit paasineqarsinnaavoq, tatigineqalerluni tikilluaqquneqarlunilu.

Tamaani qatanngutigiinniat sinnerlugit ajoqersuiartorpoq, Nainitut maanna ilisimaneqalersimasumi najugaqarluni. Naggueqatigiit Inunneersoq siulleq 1776-imi kuisippoq. Taanna Nainimi angakkuusimavoq, kuisinnerminilu Piitamik ateqalerluni.

Qatanngutigiinniat Nainimi inissipput, ullorlu manna tikillugu Nainimiillutik. Qatanngutigiinniat tikinnerminnit ukiunik 241-nngortorsiornertik sapaatip-akunnerata massuma naanerani malunnartinniarpaat, Nainimi innuttaasut peqataatillugit.

Qatanngutigiinniat Nunatsiavummi illoqarfeeqqani allani maanna oqaluffeqarput.