Canadami qamuteralaat atorlugit sukkaniuttarput
Labradorimili qimussertoqarneq ajorpoq, qamuteralannilli unammisoqartarluni.
Unammersuarneq Cain's Questimik taaneqartoq, massakkut naammasseqqammerpoq.
Cain's Quest Canadami ukiukkut sukkaniunnerni sivisunerpaatut sakkortunerpaatullu isigineqarpoq. Qamuteralaat Labrador Citymiit Churchill Fallsimut, Labradorip sineriaa atuarlugu, Labrador Citymut utertarput.
Qamuteralaat 26-t, tamarmik immikkut marlunnik inuttaqarlutik, ukioq-manna aallarput, 14-iinnaalli iluatsitsipput.
Amerikamiut Mainemeersut marluk, Tim Lessard aamma Eric Hall, ullut arfineq-marluk atoreerlugit ukioq-manna ajugaapput. Taakku 350.000 koruuninik akissarsipput.
Peqataasut 2.500 kilometerit ingerlasimagaluaraat, normu 2-nngortut ajugaasunit minutsinik marluinnarnik kingulliullutik apuupput.
Qamuteralattut ullormut 350 kilometerit ingerlasarsimapput.