Canadami pujortarneq akiorniarneqarunnaartoq

septembarip 28-at 2006 16:55

Inuit eqqillillu akornanni pujortarunnaarsitsiniarluni ukiorpassuarni paasisitsiniaanerup Canadami naalakkersuisunit sipaarniarfigineqarluni taamaatinneqarnera, nunat inuiisa kattuffiisa annersaata sakkortuumik isornartorsiorpaa. Kattuffik isumaqarpoq, naalakkersuisut konservativit taamaaliornermikkut ammip qalipaataanik erseqqilluinnartumik immikkoortitsisut.

Pujortarunnaarsitsiniarluni paasisitsiniaaneq 50 millioni koruuninik aningaasartalik iluaqutaanngitsutut nalilerlugu taamaatikkitsik Canadami peqqinnissamut ministeri oqarpoq. Eqqillit inuillu Canadami nunap immikkoortuini najugalinnut allanut naleqqiullugit pingasoriaammik tupatornerupput, naak pujortarunnaarsitsiniarluni paasisitsiniaajuartoqaraluartoq.

Paasisitsiniaanermik taamaatitsisoqarneranik nalunaaruteqartoqaannartoq Canadami naalakkersuisunut illua´tungiliuttut ingerlaannaq naammagittaalliuteqarput, Canadamilu nunat inuiisa kattuffiisa annersaat – The Assembly of First Nations – isornartorsiuisunut ilanngupput. Kattuffiup siulittaasua Phil Fontaine oqarpoq, pisoq ammip qalipaataanik immikkoortitsinertut nalilerneqartariaqartoq.

- Nunap immikkoortuini allani pujortarunnaarsitsiniarluni paasisitsiniaanerit unitsinneqanngillat. Phil Fontaine Canada.Com-imut oqarpoq.

Aamma oqarpoq, Canadami nunap inuiinut pissusilersornerit nuannerunnaariartortut. Inuit eqqillillu ineqarnikkut, ilinniartitaanikkut peqqinnissakkullu atugarisaannut pitsanngorsaanissamut 20 milliard koruuninik aningaasaliissuteqarneq naalakkersuisunit atorunnaarsinneqariarluni Canada Naalagaaffiit Peqatigiit aalajangersagaanut nunat inuiisa pisinnaatitaaffiinut tunngasumut akerliulluni taasivoq, maannalu peqqinnissamut paasisitsiniaaneq sipaarfigineqarluni.

- Taamaattumik Canadami naalakkersuisut aperisariaqarput, nunap inuiinik ikiuerusunnersut. Phil Fontaine apeqqusiivoq.

Pujortarunnaarsitsiniarluni paasisitsiniaanerit iluaqutaannginnerarlugit Canadami naalakkersuisut oqariartuutaat peqqinnissamut kattuffissuup Health Canadap marlunngormat illua´tungilerpaa, oqarluni, tupatorneq annikillisimasoq, tamannali Canadami naalakkersuisut isumaannik allanngortitsinngilaq – allatulli paasisitsiniaasoqartalernissaa parlamentip marlunngormat neriorsuutigaa.