Alaskami puisit toqungasut ernumassutigineqartut
Ualerngup Tarajuani Chukchiillu imartaasa sineriaanni toqungasunik puiseqarpoq. Immat taakku marluk Alaskap avannamut-kitaaniipput.
Puisit ikittuinnaanngillat, tassami sissami puisit toqungasut 60-it sinnerlugit maajimiit maannamut nassaarineqarmata.
Suli ilisimaneqanngilaq sooq toqusimanersut. Sumiiffinni taakkunanit aamma Amerikami imaq pillugu aqutsisoqarfinnit ilisimatuut pisup sumik pissuteqarsinnaaneranik misissuipput.
Pissutaasorisat ilagaat naammattunik nerisassaqarsimannginnerat, immap ilarujussuani siku saappallaalersimammat imaluunniit aassimalluni, taamaalillutillu nerisassarsiorfissatut aallaavigisinnaasaarussimallutik.
Aammalu silap kiassusia pisarnermit annerulersimavoq. Chukchip imartaata kujataa’tungaani immap kissassusia qaammammi kingullermi pisarnermit gradinik sisamanik affarmillu kissarneruvoq.
Ilisimatuut piniartunik Inupiaq-nik suleqateqarlutik puisit toqungasut pillugit massakkut misissuinialerput.