Canadami Nunavimmi illoqarfiit nunaqarfiillu siunissami ineriartornissaannik siunnersorneqaleruttorput
Ineriartortitsinissamik pilersaarut Plan Nordimik imaluunniit Parnasimautik-imik taaguuserneqarsimasoq, nunarsuarmi ineriartortitsisarnerni pilersaarutit annerit ilagaat.
450 milliardit koruunit ukiut 25-t tulliit ingerlaneranni atorneqarnissaat naatsorsuutigineqarpoq, erngup nukissiorfiliornernut, aatsitassalerinermi takornarialerinermilu atorneqassallutik.
Suliffiit ukiumut 20.000-it pilersinneqartarnissaat aamma naatsorsuutigineqarpoq.
Cree-indianerit Quebecimilu naalakkersuisut ineriartortitsinissaq pillugu isumaqatigiissut atsioreerpaat, taamaattorli Nunavimmi naggueqatigiit Inuit ineriartortitsinissaq pillugu eqqartuussissuserisumit siunnersorneqaqqaarnissartik siunniuppaat, pilersaarutimmi taama annertutigisut nalilersorneqaqqaartussaammata.
Nunavimmi illoqarfiit nunaqarfiillu katillugit 14-it ukiormanna januaarimiit juunip tungaanut tusarniaaffigineqassapput, suliniaqatigiiffiit assigiinngitsut aqqutigalugit suliniutit angisuut taakku tusarniaassutigineqassammata.
