Canadami nunap inuiisa misissuisussatut ataatsimiititaliortoqarnissaa piumasaqaatigigaat

Inuit hunnorujut arlallit inatsisartoqarfiup illorsuata Ottawamiittut saavani eqqaaniaallutik pingasunngormat katersuupput. Naggueqatigiit inuit indianerillu arnartaat hunnorujullit 60-ikkunniilli pieriarfeerunneqartarsimasut iliuuseqarfigineqarnissaat piumasaqaatigaat.

Loretta Saundersip illooraa Holly Jarrett eqqaaniaasoqarnerani oqalugiarpoq.

- Lorettap asannittuunera, ajunngissusaa sapiissusaalu eqqaaniarlugit tapersersoqquvunga naalakkersuisut akissuteqarteqqullugit, CBC News naapertorlugu taama oqarpoq.

Hans Kristian Petrussen, Paninguak Kruse aamma Ivana Josefsen Sorlammeersut eqqaaniaasoqarnerani najuupput. Taakku Canadami angalanerminnut atatillugu eqqaaniaasoqarnissaanut najuuteqqullugit qaaqquneqarsimapput.

- Misigisaq tupinnaqaaq soorlumi Kiisami aatsaat tammartartut maluginiarneqalersut oqartussaniit eqqaaniaaneq imartungaarmat, Hans Kristian Petrussen, canadamiut tusagassiortuinit soqutigineqarluarluni apersorneqarsimasoq oqaluttuarpoq.

- Sorlammi siulersuisut eqqaaniaanermi misigisagut tupinnaannartumik attortinnarput qullilinngitsoorfiunatillu, oqarpoq.

Loretta Saunders februaarip 13-iani periarfeerunneqarpoq kingornalu aqqusinersuup kussinerani sapaatit-akunneri marluk qaangiuttut nassaarineqarluni. Inisimasui marluk toqutsisimasutut unnerluutigineqarlutik tigusarineqarput.

Loretta Saunders Halifaximi ilisimatusarfimmi ilinniartuusimavoq, naggueqatigiit inuit arnartaasa periarfeerunneqartarnerat allaaseralugu suliaqarluni.

Misissuisussatut ataatsimiititaliorneqarnissaanik piumasaqartoqarnera alliartuinnarpoq. Nunap inuiisa arnarsaata suliniaqatigiiffiata atsiornerit 23.000-it naalakkersuisunut qanittukkut tunniuppaat.