Canadami nunap inoqqaavisa akornanni pinerluttuliortoqarneruvoq

Canadami pinerluttuliortarneq ataatsimut isigalugu 7 procentimik siorna annikilleriaraluartoq, nunap inoqqaavisa akornanni annertusiartortoq, Canadami naatsorsueqqissaartarfiup misissuinerani takuneqarsinnaavoq.
Allattoq Mads Lynge
juulip 24-at 2008 11:45

Illoqarfinni kippasinnerusumiittuni pinerluttuliortarneq annertusisimavoq, soorluttaaq nunap immikkoortuini avannarliunerusuni annertuseriartoq.

Nunap inuii tamaani amerlanerussuteqarput.

Pinerluttuliornerit Nunavummi, Northwest Territoriesimi, Yukonimi, Saskatchewanimi Manitobamilu ataatsimut isigalugit 10 procentit sinnerlugit siorna annertuseriarsimapput.

Canadami innuttaasut 3 procentii nunap inoqqaavineersuupput, parnaarussalli ataatsimut isigissagaanni 18 procentii nunap inuiineersuupput.

Pinerluttuliortarneq akiorniarlugu Canadap naalakkersuisui iliuuseqartariaqartut, alaatsinaattut oqarput.

Pissakitsuuneq akiorniarneqartariaqarpoq, innuttaasullu ilinniarnissaminnik kajumissaarneqarnerusariaqarlutik, alaatsinaattut oqarput, kiisalu aningaasaqarniarnikkut pissutsit aaqqiiviginiarneqartariaqartutut nalilerneqartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq