Canadami nunap inoqqaavi nalliuttorsiutigaat
Nunatsinni inuiattut ullorsiornitsinnut peqatigitillugu Canadami nunap inoqqaavi maanna sapaatip akunnerata naanerani inuiattut ullorsiorput. Juunip 21-at nunap inoqqaavisa inuiattut ullorissagaat, Canadami naalakkersuisut ukiut qulit matuma siornagut nalunaarutigaat, naalakkersuisunimmi oqaatigineqartutut, ullormi tassani naggueqatigiit Inuit, indianerit aamma Métis-it ataqqiniarneqarlutillu nalliuttorsiutigineqartassammata, taamaalillunilu Canadamut pingaaruteqassusiat akuersaarneqassammat.
Junip 21-at pisortatigoortumik ulloritinneqartarpoq, ukiormannali sapaatip akunnerata naanera tamaat nalliuttorsiortoqartussaavoq.
Nunaqarfinni, nunaannarmi illoqarfinni, illoqarfinnilu allani naggueqatigiit Inuit, indianerit métis-illu najugaqarfiini tamani nalliuttorsiualaartoqarpoq.
Illoqarfiit pingaarnersaanni Ottawami angisuunik aaqqissuussinikkut nalliuttorsiualaartoqarpoq. Indianernit nuna tamakkerlugu peqataaffigineqartumik, kusanaqisunik inuiattut atisalersorluni, nigalinngorluni qilaatersorluni erinarsorlunilu qittattoqarluni.
Aamma nunap inoqqaavinik nipilersortoqarluni nutaalianik pop-imik rockimillu tusarnaartitsisoqassaaq, ilaatigut erinarsortartumit naggueqatitsinnit tusaamasamit Lucie Idlout-mit Nunavummeersumit peqataaffigineqartumik.
Nunap inoqqaavisa arnartaasa kattuffiata saqqummersitsinera, nalliuttorsiualaarnerni uitsatigineqarnerpaanut ilaavoq. Saqqummersitsineq taaguuteqarpoq, arnat kiinaqanngitsut, taakkulu tassaallutik inuusat 600-t naggueqatigiittut Inuttut, indianerisut métis-itulluunniit atisallit, kiinaqanngitsulli.
Taakku niaqoqarput, oqaatigineqareersutulli kiinaqaratik, taakkulu nunap inoqqaavinut periarfeerunneqartarsimasunut, kinaaneri ilisimaneqanngitsunut assersuutaallutik.
