Canadami niuernikkut saqqummersitsinersuaq ullumi ammaarnersiorneqassaaq

Niuernikkut saqqummersitsinersuaq, Northern Lights Trade Show, Niuffatsitsineq Arsarnerit, Canadap illoqarfiisa pingaarnersaanni Ottawami ulluni tullerni sisamani ingerlanneqassaaq.
Allattoq Marianne Stenbæk, Montreal, Canada, Simon Uldum
januaarip 29-at 2014 04:09

Niuernikkut saqqummersitsineq Labradorimi niuertut peqatigiit Nunavummilu niuertut peqatigiit suleqatigiillutik aaqqissugaraat. Aammattaaq Nunavimmit Inuviauloqarfimmiillu peqataaffigineqassaaq.

Niuertarfiit suliffissuillu 200-nit amerlanerusut nioqqutiminnik kiffartuussinermillu neqeroorutiminnik kiisalu takornariartitsinikkut neqeroorutiminnik saqqummersitsissapput.

Niuernikkut saqqummersitsineq, Northern Lights, ukioq allortarlugu ingerlanneqartartoq Canadap issittortaani aningaasarsiornikkut ineriartortitsinermut pingaaruteqartupilussuuvoq. Niuernikkut saqqummersitsinerup 2000-it sinnerlugit alakkarterneqarnissaa naatsorsuutigineqarpoq.

Niuernikkut saqqummersitsinermi Canadap kujasinnerusortaaneersunut sunik neqerooruteqartoqarsinnaanera saqqummiunneqaannarani, aamma issittumi nunap immikkoortuineersut imminnut ilisarisimanerulernissaannut immaqalu suleqatigiilernissaannut atorneqartarpoq.

Niuernikkut saqqummersitsinersuarmut atatillugu ukiormanna aamma aningaasarsiornikkut ineriartorneq pillugu ataatsimeersuartoqarluni kulturikkut aliikkusersuinerit assigiinngitsut ingerlanneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq