Canadami nanoqassuseq assortuussutaasoq

Nannut ikiliartortut USA-mi isumaqartoqarpoq. Canadamili allatut isumaqarput. Nannummi tamaani ikiliartunngitsut isumaqarput, ilami allaat amerliartorsorineqarlutik.
Assi © : Vilhelm Lynge Hard /KNR
Nutserisoq Elisa Isaksen

Canadami nannut amerlassusiinik nakkutiginninnermik aaqqissuulluakkamik ukiuni kingullerni tallimani ingerlatsisoqarpoq.

Tamatuma saniatigut  naggueqatigiit Inuit piniartut peqatigiiffii Qeqertaalummiittut namminneerlutik misissuisarput, tamakkulu ersersippaat nannut ikiliartunngitsut ilami allaat amerliartorsorineqarlutik.

Taama nalunaartoqarnera Amerikamiut ilisimatuuisa isumaannut akerliulluinnarpoq taakkumi isumaqarmata, nannut ikiliartortut.

Taamaattumik Canadami avatangiisinut ministeri Leona Aglukkaq, Akilinermi naggueqatigiit piniartortaat peqatigalugit qanoq nanoqartiginera pillugu USA-mi Amerikamiut atorfilittaannik kattuffinnillu   sapaatip akunnerani matumani ataatsimeeqateqartarpoq.

 

Naggueqatigiit Inuit asseqanngitsumik paasisimasaqartut

Tamatumunnga atatillugu ministeri tusagassiuutinut oqaaseqarpoq, Canadami pisortat allaffeqarfianni ilisimatuut isumaat aamma naggueqatigiit Inuit qangaaniilli ilisimasaasa isiginiarneqanerat nammineq naggueqatigiinnut Inunnut ilaasutut tulluussimaarutigigini.

- Akilinermi naggueqatigiit Inuit issittumi avatangiisinut asseqanngitsumik paasisimasaqarput, taakkumi tamaani ukiuni tuusintilikkaani inuusimammata, taakkununnga tusaaniarnitsigut nannunik pitsaanerusumik aqutsisinnaavugut, Leona Aglukkaq oqarpoq.   
     
Taassuma ilanngullugu oqaatigaa, nannunniartarnerup naggueqatigiinnut Inunnut qanoq pingaaruteqartiginera ataatsimiinnerup kingorna Amerikamiunit nunanillu tamalaanit paasineqarnerussasoq.