Canadami nannut amerlassusaat assortuussutaapput
Ilisimatuut piniartullu oqallisingaatsiarput. Pingaartumik nannut amerlassusaat sakkortuumik assortuussutigineqarpoq. Ilisimatuut isumaqarput nannut ukiut nikiffianni nungukkumaartut, piniartulli isumaqarlutik nannut ukiut 50-it tulliuttut ingerlaneranni maannakkornit marloriaatinngussasut.
Ataatsimiinnissamut aggersaasoq, Canadami avatangiisit pillugit ministeri, Jim Prentice, oqarpoq, isummat assigiinnginnerat ersareqisoq.
Ataatsimiinnermi aamma oqallisaavoq, Inuit ileqqutoqaat nunani killerni ilisimatuut qaffasissumillu atorfillit ataqqinerusariaqaraat.
- Taama suleqatigiittoqassappat, suleqatigiinnerlu iluatsilluassappat, Inuit, ilisimatuut atorfilittallu ataqqeqatigiittariaqarput, isiginninnerit assigiinngitsut taamaalillutik ilanngussuunneqarsinnaanngorniassammata, Canadami ICCp siulittaasua, Duane Smith, ataatsimiinnerup nalaani taama oqarpoq.
Silap pissusaata allanngoriartornera nannut amerlassusaannut sunniuteqarsinnaasoq Canadami avatangiisinut ministerip aarleqqutigigamiuk, nannut piujuaannarnissaannut alaatsinaatsussanik ataatsimiinneq naggataarlugu ataatsimiititaliorpoq.