Canadami naggueqativut isumannaallisaaffigineqarput

Mexicop Kangerliumanersuani uuliasiornikkut ajutoorneq Canadamiut ilarpassuisa ernumanartoqartippaat. Naggueqatigiit Inuit Qeqertaaluup sineriaani nunaqartut kimmut Tuttuujaartooq tikillugu Canadami sinerissamik nakkutilliisunit, ajutoortoqarsinnaaneranut sillimaniarnermut ikiorserneqarput, taamaalillutik ajutoortoqassagaluarpat iliuuseqarsinnaaniassammata.

Sinerissamik nakkutilliisut poortukkamik angisuumik 'ajutoortoqartillugu atugassiamik' pilersitsisimapput. Nunaqarfiit ajutoortoqarpat eqqugaariaannaanerusutut isigineqartut 19-it, tamarmik immikkut containerinik marlunnik pilersorneqarput. Ajutoortoqarneranut sillimmatissanut ilaapput umiatsiaaraq aquuteralammik motoorilik, akoorutissat assigiinngitsut, immamik sissamillu saliinermi atorneqarsinnaasut, tamatuma saniatigut puttasut uuliap sissamut pinngitsoortinniarnissaanut atorneqarsinnaasut ilaapput.

Containerit taakku nunaqarfinnut 19-inut nassiussuunneqareerput, tamannalu Canadami sinerissamik nakkutilliisunut 10 millionit koruunit missaannik aningaasartuutaassaaq.

Containerit nunaqarfinniittut assiliaataaginnarnavianngillat. Tassami sinerissamik nakkutilliisut nunaqarfimmiut containerit imaasa atornissaannik ilinniartikkusuppaat, taamaalillutik ajornerpaamik pisoqassagaluarpat - soorlu uuliamik maqisoortoqassagaluarpat allatulluunniit sakkortuumik mingutsitsisoqassagaluarpat, tamanna piareersimaffiginiassammassuk.