Canadami naggueqativut aningaasaliiffigineqarput
Canadami aningaasaqarniarneq USA-misulli ajortiginngilaq, aningaasaqarniarnerulli maannakkut aningaasarliortoqarnerani ingerlalluarnerunissaa Canadami naalakkersuisunit misiligarneqarpoq. Missingersuutit nutaat Canadami tamarmi atuuttussat naalakkersuisut sapaatip akunnerani uani saqqummiuppaat. Canadami naggueteqatitsinnut taakku arlalinnik pitsaaquteqarput. Aningaasaqarniarnerup ingerlalluarnerunissaa pillugu marlunnik siunnersuuteqartoqarpoq… tassa akileraarutit appartinneqassapput, nutaanillu sanaartortitsisoqassaaq. Naggueqatitsinnut tassa taama pisoqarpoq. Naggueqatitta akileraarutaat annikikkaluamik appartinneqarput, kisianni tassa kaasarfimmiussaqarnerulerput. Nutaanik sanaartortoqalissaaq. Nunavummi Inuvialummilu nutaanik illuliortiternissamut 1 milliardi koruunit sinnilaarlugit aningaasaliissutigineqarput. Nutaanik sanaartornisaq naggueqatitsinnut pingaaruteqaqaaq, aammali illoqarfinni nunaqarfinnilu suliffissat qulakkeerneqassallutik. Pangniqtuuq-mi nutaamik pitsaanerusumillu aamma umiarsualiviliortoqassaaq. Pitsaanerusumik Peqqinnissamut Isumaginnittoqarfeqalernissaa naggueqatitta qangali amigaatigaat, tamanna aamma aningaasaliiffigineqarpoq. Canadami naggueqatitta kissaatigaat Montrealimi Ottawamiluunniit peqqinnissaqarfiit pitsaalluinnartut assinginik peqalernissartik, kiffartuunneqarluarnerunissartillu angorusuppaat. Tamatuma pivisusunngornissaanut aqqut suli ungasippoq, aningaasanilli immikkoortitsisoqarnera qanillattuutaassaqaaq. Aningaasaqarniarnerup ineriartortinneqarnissaa eqqarsaatigalugu nutaamik allaffeqarfiliortoqarnissaanut 50 millioni koruuninik aamma immikkoortitsisoqarpoq, tamannalu Canadami naggueqatitsinnut issittumilu najugalinnut allanut iluaqutaassaqaaq.
