Canadami naggueqatitta nunaanni arfivinniarneq aallartippoq

Arfivinniarneq Ungavap kangerliumarngani ingerlanneqassaaq, soorlu siorna aamma tassani arfivinniarneq ingerlanneqartoq.

Nunaqarfimmiut Kangiqsujaqmiut ataatsimik arfivittassineqarput. Kangeqsuajaqmiut siorna ataatsimik aamma arfivittassinneqarput, sivisuumik pisassinneqarnikuusimanatik.

Arfanniartarnerup allarteqqinneqarsinnaanera Canadami Aalisarnermut ministereqarfiup illlersorneqarsinnaasutut nalilerpaa.

Piniartut Kangiqsujuaqmiut arfanniartarneq pillugu ullut arlallit atorlugit ilitsersuunneqarput, aatsaanngooq taamatut arfannissammata, Canadami ilanngutassiortorput Marianne Stenbæk oqaluttuarpoq.

Arfanniat ilisimatuunit malinnaaffigineqarput, arfivimmik pisaqartoqarpat, ilisimatuut paasissutissanik atugassaminnik tigusiniaramik. Taakkua saniatigut ministereqarfimmeersunit arfanniat malinnaaffigineqarput, arfanniarnermi malittarisassat piniariaatsillu malinneqarnersut nakkutigiartorlugit. Taakkua peqataanerannut pissutaatinneqarpoq, uumasunik illersuiniaqatigiit naammagittaalliornissaat naatsorsuutigineqarmat.

Siorna arfivimmik pisaqartoqarmat iluatsittutut oqaatigineqarpoq. Nunavimmi nunaqarfiit 14iusut tamarmik arfiviup neqaanik tunineqarmata, neqaagooq mamarineqarluarmat.

Arfivinniarneq ullut arlallit matuma siornatigut aallartippoq, siorna siusinnerusukkut aallartippoq, ukiormanna arfanniarneq kingusinnerusukkut aallartinneqaranut pissutaavoq silap nillertinnerunissaa utaqqineqarmat.

Arfiviit pingasut takuneqareersimapput. Arfivik piniartut malersugaat siulleq tassaasimavoq arfivik arnaviq piaralik, taakkuali pisarineqarnissaannut aalisarnermut ministereqarfimmit inerteqqutigineqarpoq.

Piniartut Kangiqsuaqmiut maanakkut arfivinialeruttorput, neriuutigineqarluni sapaatip akunnerata tulliata ingerlanerani pisaqarumaartut.

Arfivik pisarineqarpat Nunavummi nunaqarfiit 14-iust arfiviup neqaanik agguaassiffigineqassaasut