Canadami naggueqatitta ataatsimut allattaaseqalernissaat aalajangerneqartoq
Allattaaseq pillugu aalajangiineq tamanna allattaatsit pillugit aalajangernikuunerit pingaarnerpaat ilagaat. Allattaaseq akuerineqartoq Inuktitut Qaliujaaqpait-imik taaguuteqarpoq.
Ataatsimut allattaaseqalerneq naggueqatigiit inuit tamarmik assigiimmik atuagaqarsinnaanerannik kinguneqassaaq, taamaalillunilu Inuit Nunangani kiisalu Kalaallit Nunaanni Alaskamilu naggueqatigiit inuit tamarmik attaveqaqatigiinnerat ajornaannerulissalluni.
Oqaatsit pillugit immikkut ilisimasallit eqimattat allattaatsimik nutaamik ineriartortitsinissamut ukiut arfineq-pingasut matuma pilersinneqarput. Eqimattat utoqqarnut kiisalu atuarfinni ilinniartitsisunut Inuktitullu oqaatsinut allanut immikkut ilisimasalinnut paasiniaangaatsiarnikuupput.
AAMMA ATUARUK Canadami naggueqatigiit Inuit assigiimmik allattaaseqalerusuttut
Allattaatsit assigiinngitsut maannamut atorneqarsimapput, ilaatigut Nunavummi Nunavimmilu atorneqartut, taanikkaarinerit immikkut ittut atorneqarlutik.
Allattaatsimik nutaamik latinerisut naqinnerit, tassa naqinnerit kalaallisut allattaatsimi nutaaliami aamma atorneqartut toqqammavigineqarput.
Allattaasitaarnissamut siunnersuut Makivik Corporationimi siulittaasumit, Nunatsiavummilu siulittaasumit, Johanne Lampemit ITK-p ukiumoortumik ataatsimiinnerani pisortatigoortumik siunnersuutigineqarpoq, taannalu ITK-p siulersuisuinit akerliusoqarani akuerineqarluni.
AAMMA ATUARUK Canadami naggueqatigiit inuit ataatsimoorussamik allattaaseqalernissaq eqqarsaatigaat
Inuit Nunangani Inuktitut oqaatsit siuarsarnissaannut alloriarneq pingaaruteqartoq, ITK-mi siulittaasup, Natan Obedip tusagassiuutinut oqaatigaa. Tamanna aamma namminersornerulernissamut alloriangaatsiarneruvoq, allattaatsimmi qangatoortut nunasiaataanerup nalaanni pilersinneqarsimasut siulittaasup oqaatigaa.
- Ataatsimut allattaaseq nutaaq naggueqatigiinnut inunnut kattutsitsissaaq, tassami allattaaseq naggueqatigiinnut inunnut suliarineqartoq naggueqatigiinnit inunnit suliarineqarmat, Natan Obed naggasiivoq.