Canadami naggueqatigiit Inuit imminut toquttartut amerlanerungaatsiarput

Montrealimi tamanna pillugu qanittukkut ataatsimiittoqarmat, Nunarsuaq tamakkerlugu imminut toquttarneq pinaveersaatinniarlugu suliniaqatigiiffissuarmi, The International Association for Suicide Preventionimi ilisimatooq, Jack Hicks Nunavumi imminut toquttarneq pillugu misissuinermik saqqumiussivoq.

Canadami naggueqatigiit Inuit 1970-ikkunnili ajornartorsiutinik kingunerlutsitsisalernerat aallarnerfigalugu, imminnut toquttartut amerlanerulersimasut ilisimatooq, Jack Hicks isumaqarpoq.

Canadami naggueqatigut Inuit 1970-ikkut siorna qaqutigut imminut toquttarsimapput. Tamatumali kingorna, Canadami ineriartorneq sukkatsimmat, naggueqatigut amerlasuut najugarisatik qimallugit illoqarfinnut annernut nutserput.

Imminnut toquttartut amerlinerinut, atuarfinni nerisaqarfiutigalugitik ineqarfiusuni naggueqatitta meerartaasa ajortumik pineqartarsimaneri aamma pissutaaqataatinneqartut, ilisimatooq Jack Hicks oqarpoq.

Naggueqatitta angutitaasa piniartutut aalisartutullu inuuneq qimattariaqarsimanerat aamma pissutaalluni, naggueqatitta arnartaanit ullumi atugarliorneroqisut misissuinermi paasineqarpoq.

Taamaammat angutit inuusuttut 15-iniit 25-t tungaanut ukiullit imminut toquttartut tupaallannganngitsoq, Jack Hicks isumaqarpoq.

Jack Hicksip Canadami misissuineranut assingusumik Nunatsinni taassuma misissuinermini inernerit, ukiup massuma ingerlanerani saqqummiussavai.