Canadami naggueqatigiit inuit ataatsimoorussamik allattaaseqalernissaq eqqarsaatigaat

Ataatsimiititaliami, 2012-imi pilersinneqartumi oqaatsinik paasisimasaqarluartut qulit ilaasortaapput, ataatsimiititaliarlu Inuit Tapiriit Kanatamut atavoq, ilinniagaqarnermut sullissiviulluni.

Naggueqatitta Inuit assigiimmik allattaaseqalersinnaanerannik ujartuinerup piviusunngortinneqarnissaa ataatsimiititaliap anguniagaraa. Naggueqativut Inuit marlunnik assigiinngitsunik allattaaseqarput, ikittunnguit allatut allattaaseqarlutik.

Paggivittami Issittullu kippasissortaani oqaatsinut naqinnerit nunarsuup annersaani atorneqartut assigaat, naqinnerit kalaallisut atorneqartartut ilaallutik.

Nunavimmi Nunavummilu naggueqatitta Inuit allattaaseq syllabics, Cree indianernit qanga kingornunneqartoq allattaaseraat.

Naggueqatitta Inuit siulittaasuat, Mary Simon, naggueqatitta Inuit nunarsuaq tamakkerlugu ilinniartitaanerannut akisussaasuusoq, Radioaviisimut oqarpoq, assigiimmik allattaaseqarnissaq pisariaqartoq ataatsimiititaliap nassuerutigigaa, Canadap issittortaani naggueqatitta Inuit tamarmik - ilinniartitaanerup tungaatigut atortussatigullu - atugassaat siunissami taamaalillutik assigiilerniassammata.

Naggueqatitta inuit Canadami suliffeqarfii arlallit allallu ataatsimiititaliap pulaaqattaarniarpai, taakkulu innersuussutaat tamarmik katersorneqareerpata, naggueqatitta Inuit assigiimmik allattaaseqalernissaannik eqqarsaatit saqqummiunneqassapput, tamanna pissalluni naggueqativut Inuit aappaagu 2015-imi ukiakkut ataatsimeersualerpata.