Canadami naalakkersuisut: Utoqqatserpugut

Angerlarsimaffik 2000 kilometerisut ungasitsigalugu. Toqqini najugaqarluni. Nuuffigisarlu piniagassaqanngitsoq. Tamakku misigisaasa ilaannaraat, Canadami nunaqarfimmi Inukjuarmi ilaqutariit 19-nit Canadap avannaata issinnerusortaanut Aasuitsumut 1953-imi nuutsinneqaramik.

Pinngitsaalineqarlutik nuutsitaasut neriorsorneqaraluarput ukiut marluk qaangiunneranni nunaqarfiminnut uteqqissinnaasut, kisianni nuutsitaaneq ukiuni 37-ni sivisutigaaq.

Ippassaq, ukiut 60-ingajaat qaangiuttullu Canadami naalakkersuisut pisortatigoortumik utoqqatserput. Utoqqatsissutigaat ilaqutariit imaannaanngitsumik misigisaqartitaasimammata, Inuillu inuunerannik amerlasuunik akeqarsimammat.

- Pinngitsaalisaallutik nuutsitaasimasut atugarliorsimanerannik qamannga pisumik misiginneqataavugut. Angerlarsimaffimmininngaanniit peersitaasimapput. Nuuleramik atortunik nerisassanilluunniit tunineqarsimanngillat, eqqortunillu paasissutissanik tunineqarsimanatik, nunap inoqqaavinut ministeriusoq, John Duncan oqalugiaammini ilaatigut taama oqarpoq.

Pisortatigoortumik Inunnut utoqqatserneq, nunaqarfimmi Inukjuarmi pivoq, najuupput taamani pinngitsaalineqarlutik nuutsitaasut marluk ilaat.

Martha Flaherty 1953-mi nuutsitaanerminni tallimanik ukioqarpoq, angajoqqaani ilagalugit Aasuitsumut nuupput.

1953-mi pinngitsaaliilluni nuutsitsineq pillug filmiliortoqarpoq piviusumik tunngavilimmik. Tassanilu Martha Flaherty pingaarnertut inuttaavoq, filmi taaguuteqarpoq "Martha of the North", Martha Avannaamioq. Filmilu Martha Flaherty ima oqaluttuarpoq:

- Aallartinnata oqaluttuunneqarpugut, inuuneq uangutsinnut oqinnerulissasoq. Nutsitaaffitsinnulli tikikkatta paasivarput, nuna inunnik inuuffigineqarsinnaarpianngitsoq nuuffigisimallutigu. Uumasoqarpianngimmat sivitsunngitsoq nerisassaarulluta kaalerpugut. Isseqaarlu. Ilagut sapilerlutik toqupput, Martha Flaherty filmimi ilaatigut taama oqaluttuarpoq.