Sisaat sullullit uuliap aqqutissaata Trans Mountainip assortuussutaasup sananeqarnissaanut atoriaannanngorlugit qaleriissaarneqarput.Assi: Scanpix

Canadami naalakkersuisunngorlaat uuliap aqqutissaa pillugu isumaqatigiinngitsupilussuusut

Canadami ikinnerussuteqarlutik naalakkersuisuulersut aningaasaleerujussuarnermik akisuumik ajornartorsiuteqaleratarsinnaapput. Kajumittumillu partiimik tapersersortissaqanngitsoq Nunavummiut qinigaaqqammersut erseqqissaatigaat.

Justin Trudeau Canadami ministeriunertut atuuteqqissaaq, taassumalu naalakkersuisuutitai nunap inoqqaavinut saammaateqatigiittoqarnissaanut avatangiisinillu illersuinissamut illersuilluarnikuupput.

Canadamiut naalakkersuisuisa sullulik aqqutissaq, Trans Mountain, amerikamiut suliffeqarfiutaannit Kinder Morganimit 22 milliardit koruunilerlugu 2018-imi aggustimi pisiaraat.

AAMMA ATUARUK Uuliap aqqutissaa assortuussutaasoq Canadami akuersissutigineqartoq

Tamannalu Nunavummit inatsisartunut ilaasortanngorlaap, Mumilaaq Qaqqap, ernumanartoqartippaa.

Uuliap aqqutissaa Albertamiit illoqarfimmut Burnabymut umiarsualiveqarfiusumut Manerassuup sineriaani inissisimasumut sananeqassaaq, uulialu tassuuna assartorneqartoq Burbabymiit umiarsuarmik uuliamik assartuummik assartorneqaqqittassaaq. 
Paasissutissanik pissarsiffik: Mapbox Openstreetmap

- Trudeaup ukiuni kingullerni ministeriunertut sulinera malinnaavigaarput. Canadami nunap inoqqaavinut atassuteqarnerup qanoq pingaartigineranik oqaluttoq tusaavarput. Uuliap aqqutissaanik nunap inoqqaavisa akerlerisaannik 4,5 milliardit dollarilerlugu pisisoq aamma takuarput. Tamanna pissutigalugu atassuteqarneq tassunga qanoq pingaartiginersoq uannut qulartitsilerpoq, Mumilaaq Qaqqaq oqarpoq.

Uuliamik assartuinerulersinnaanngussasut

Canadap kippasissuani Albertami nunap immikkoortuata aningaasaqarneranut suliffissaqartitsineranullu tunngaviusumik uuliaqangaatsiarpoq.

AAMMA ATUARUK Nunavummiu inuusuttoq Canadami inatsisartunut qinerneqartoq

Uuliamilli nunap immikkoortuanit canadami nunarsuarmiluunniit niuerfinnut allanut assartuineq unammillernartarpoq.
Uuliap aqqutitoqaa 1953-imeersoq imartussusaa naammanngilaq, aqqusinikkullu assartuineq akisulluni.

Aningaasaliineq nutaaq atorlugu nappartanik uuliamik imalinnik 890.000-inik sineriammut ullut tamarluinnaasa assartuisinnaatitsissaaq. Nappartat uuliamik imallit maanna assartorneqartartut 300.000-iupput.

Ruujorilli ingerlaarfissaata ilarujussua indianereqarfiuvoq.

Nunat inoqqaavi akornanni aaqqiagiinngittoqartoq

Amerlasuullu suliniummut aamma nuannarinninngillat, naak tamanna uuliamik assartuinermut ajornaannerulersitsillunilu suliffissaqartitsissagaluartoq.

Nunap inoqqaavisa avatangiisillu pillugit suliniaqatigiiffiit ruujorit aqqutaat nutaat qanoq kinguneqassanersut ernumassutigaat.  

Tamanna nunap inoqqaavisa akornanni avissaartuutsitsivoq, pissutigalugu ruujorip allilerneqarnera suliffissanik aningaasanillu iluanaarutissartaqarnera ilaasa tapersersorpaat, allallu tamanna pinngortitaq uumasullu pillugit akerleralugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat