Canadami ministeriuneq: Issittoq nunallu inoqqaavi sammineqangaatsiassapput
Ministeriunerup Trudeaup Canadami naalakkersuisunngorlaat allakkamik pisarnermisut sapaatip akunnera kingulleq tunivai. Allagaq ukiuni sisamani tulliuttuni suliassaannut tunngasuusarpoq.
Issittoq nunallu inoqqaavi sammineqangaatsiassasut allagaani takuneqarsinnaavoq.
AAMMA ATUARUK Canadami naalakkersuisut toqqarneqartut
Nunap inoqqaavi ministeriunermut Canadamullu pingaaruteqarnerpaasut APTN News naapertorlugu ministeriunerup allakkamini tamani aallarniutigaa.
- Nammineq aalajangiinissamut pisinnaatitaanerup tapersersornissaanut pikkorissisimaqaagut. Nunap inoqqaavinut sullissineq pitsanngorsimavoq kiisalu saammaateqatigiinneq pitsanngoriartorluni, ministeriuneq allappoq nangillunilu:
- Taamaattumik qinigaarlaat naalakkersuisoqarfimminni intiaanerinut, métisinut naggueqatigiinnullu inunnut suliniutit pioreersut qanoq pitsanngorsarneqarnissaannut pilersaarusioqquakka.
Innersuussutit piviusunngortinneqassapput
FN-ip Nunap inoqqaavisa pisinnatitaaffii pillugit nalunaarutaannik Canadami inerisaanissaq taamatullu atuutilersinneqarnissaat Nunap inoqqaavinut ministerip Carolyn Bennettip suliassarilerpaa.
Kiisalu Ilumoortussaq Saammaasseqatigiinnissarlu pillugit Isumalioqatigiissitap 2015-imi innersuussutai, suli atuutilersinneqanngitsut, 94-it atuutilersinnissai aamma sulissutigissavaa.
AAMMA ATUARUK Nunavummiu inuusuttoq Canadami inatsisartunut qinerneqartoq
Nunap Inoqqaavisa Arnartaat Periarfeerussat Toqutaasimasullu pillugit Misissuinermut Isumalioqatigiissitap innersuussutaasa 200-t missaanniittut atuutilersinniarneqarnissaat Carolyn Bennettip suliassaasa pingaarnerit aamma ilagaat.
Canadami nunap inoqqaavisa atugaat pitsanngorsaavigineqarnissaat ministerinngortut allat aamma suliassaraat.