Canadami issittoqarfiit ineriartortinneqassapput

Canadami inatsisartunut ippassaq qinersisoqarpoq. Qinersinerup kinguneranik ikinnerussuteqarluni naalakkersuisunngortitsisoqassaaq, konservativit partiannit, ministeriuneq Stephen Harper siuttoralugu aqunneqartunik. Naak ikinnerussuteqarlutik naalakkersuisuusussaagaluarlutik, piffissami qinigaaffimmi kingullermernit ingerlalluarnerunissaat naatsorsuutigineqarsinnaassaaq, tassami illuatungiliuttut partiata liberaliusup ilaasortaatitarpassui qinigaaqqinngitsoormata, taamalu sanngiinnerulerlutik.

Qinersinerup kingornagut ministeriuneq Stephen Harper ippassaq unnukkut oqarpoq qinigaaffimmi nutaami pingaarnerutinniarini aningaasarsiornikkut ajornartorsiorneq, silap pissusaata allanngoriartornera, inuussutissarsiornikkut ineriartortitsineq kiisalu issittumi ineriartortitsineq.

Aningaasarsiornikkut ajornartorsiorneq aaqqiiviginiarlugu partit tamarmik suleqatigiinnissaat partit siuttuisa tamakkerlutik neriorsuutigaat. Canadamili aningaasarsiornikkut ajornartorsiorneq USA-misut imaluunniit Europamisut ilungersunartiginngilaq.

Ministeriunerup Stephen Harperip Canadami nunat issittut ukiup kingulliup ingerlanerani arlaleriarluni tikeraartarpai. Issittumilu pisuussutit kisiisa pingaartitarinngilai. Qineqqusaarnerup nalaani naggueqatigiit Inuit siuttuinik suleqateqarniarluni arlaleriarluni oqaatigisarpaa, matumani Canadap issittumi inissisimanera nukittorsarniarlugu kiisalu naggueqatigiit Inuit inuuniarnikkut atugaat pitsanngorsaaviginiarlugit.

Canada nunarsuatsinni issittumik nunataqarnerpaanut ilaavoq, taamaattumillu silap pissusaata allanngoriartornera pingaartinneqarpoq, ingammik Sullualuk maanna aqqutigineqarsinnaalermat.

Naalakkersuisunngortussat ukiuni marlunni pingasuniluunniit atasinnaanissaat naatsorsuutigineqarpoq aamma inatsisartuni partit tallimaasut suleqatigiilluarnerunissaat naatsorsuutigineqarluni.