Canadami inuit meerartaat toqujaartut amerlasut
Nalunaarusiami nutaami, UNICEF-ip Canada-mi immikkoortortaata sapaatit akunnerani qaangiuttumi saqqummersitaani, paatsuugassanngitsumik ersepoq, Canadami inuit meerataat peqqinngeqisut. Peqqissutsikkut atugaat nunani ineriartortuni atukkanut naleqqersuunneqarsinnaalerput. Tassalu inuit meerartaasa toqujaartut amerlassusaat Sri Lankamisut Fiji-misullu iinnarpoq. Tassalu amerlavallaaqqaat.
Inuit Tapiriit Kanadami præsidentiat, Mary Simon, tusagassiorfinnut oqarpoq, nalunaarusiaq misilitsinnermi allagartatut isigigaanni, inuit meerartaat angusinngitsoortut.
- 1000-it inunngoraangata 16-it toqusarput, taamannalu akuerineqarsinnaanngilluinnarpoq, Mary Simon oqarpoq.
Inuit Canadami kisiartaallutik aamma tuberkulosimik nappaalapput. Taakkua saniatigut inuit 265-it puulukit nappaataannik napparsimapput, Canadap sinneranit amerlaneroqalutik.
Ineqarnikkut atukkat ajortut kimikitsunillu nerisaqartarneq inuit taama atugaqarnerannut patsisaatinneqarpoq.
UNICEF-ip nalunaarusiaata ersersippaa, Inuit meerartaasa Canadamilu meeqqat allat peqqissusaat assigiinngippallaarujussuartut. Inuit meerartaasa 33 procentii arlaannik anigorsinnaanngisaminnik nappaateqateqarput. Aamma Inuit meerartaat tuberkulosertut Canadami meeqqanut allanut naleqqiullutik 90-eriaammik amerlanerupput.
Mary Simon aamma oqarpoq, ajornartorsiutinut tamakkununnga sukkasuumik ajornannginaarluguluunniit aaqqiissutissaqanngitsoq, assigiinngitsorpassuartigullu iliuuseqartoqartariaqartoq pingaarluinnartorlu maannakkorluinnaq iliuuseqarnissaq. Tassami Inuit tamarmik 35 procentii 15-it inorlugit ukioqarput.