Canadami Inuit eqqartuussivikkoortumik misissueqqusisut
Indianerit naggueqatigiillu inuit atuarfinni najugaqarfiutigisartuni atornerluisarnerit naalliutitsisarnerillu pillugit Canadami eqqartuussinerit arlaqartut ukioq 2000-miilli aallartipput.
Taakkua pillugit Canadami ministeriuneq pisortatigoortumik utoqqatserpoq taarsiiffigittoqarlunilu.
Eqqartuussinerit ingerlanneqarneranni naggueqatigiit inuit indianerillu Labradorimiittut ilanngunneqanngillat.
Taakkua eqqartuussinerni ilanngunneqarsimannginerat pillugu Labradormi naggueqatigiit inuit aamma Nunatsiavummi siulittaasup Sarah Leop ukiorpassuarni sakkortuumik isornartorsiorpaa.
Sarah Leo KNR-imit siorna aasakkut apersorneqarluni oqarpoq, maanna piffissanngortoq naggueqatigiit inuit Nunatsiavummiittut utoqqatserfigineqarnissaa taarsiiffigitinnissaallu.
eqqartuussisoqarnermi atuarfiit angerlarsimaffiutigisut naggueqatigiit inuit atuarfii marluk pineqarput aamma indiaanerit atuarfigisaat pingasut.
Eqqartuussinerit novembarip qaammataanni aallartissimasussaagaluarput ukiulli tullianut septemberip qaamaataanut kinguartinneqarluni.
Naggueqatigiit inuit eqqartuussissunut suliassanngortitsinermi Canadami naalakkersuisuut aamma nunap immikkortuani naalakkersuisut taamatullu upperisarsioqatigiit assigiinngitsut taamatullu atuarfinni angerlarsimaffiutigisartuni aqutsisut eqqartuussisunut suliassanngortinneqarput.