Canadami inuit attortinnartumik utoqqatserfigineqarput

Ulloq Canadap inoqqaavisa ukiorpassuarni utaqqisimasaat ippassaq nalliuppoq. Ministeriuneq Stephen Harper Ottawami canadamiut inatsisartuisa ataatsimiittarfianni utoqqatsermat, KNR-ip ilanngutassiortua najuuppoq.
juunip 12-at 2008 10:04

Canadami tamarmi inuit eqqillillu ataatsimut katersuupput utoqqatsernissaq ukiorpassuarni utaqqisimasartik tusarniarlugu. Inatsisartut ataatsimiittarfiata silataani inuit untrilikkuutaarput .. ataatsimiittarfiullu iluani eqqillit inuillu 700-llutik. Ministeriunerup Harperip inuit aqqanillit, eqqillit metisillu ilagalugit ataatsimiittarfimmut isermat qilaatersorpalaaq sallaatsoq ungataani tusaaneqarsinnaavoq. Taakkunannga inuit marluupput, tassalu Mary Simon aamma Peter Irniq.

Ministeriunerup Harperip utoqqatsissutigaa Canadami naalakkersuisut politikkiat tassaasimasoq Canadap inoqqaavisa kulturimut allamut sunnerniarnissaat tamaviaarlutik sulissutigissallugu ..kiisalu meeqqanut, angajoqqaanut taakkualu angajoqqaavinut oqaatsit kulturillu aaqqissugaasumik aserorterneqarnerannut utoqqatserpoq, atuarfinnullu nerisaqarfiutigisunut aallartinneqarnerminni atornerlunneqartarsimanerannut utoqqatserluni ..ajortulianik allattuiffik takeqaaq.

Inuit eqqillillu tusarnaariat qullii uluaasigut kuupput, utoqqatsissuterpassuit imaaginnarlutik takkussulermata.

Mary Simon, Inuit Tapiriit Kanatami, siulittaasuat Inuit sinnerlugit oqaaseqarpoq. Puisip amianik aatsulerluni, isini imerlaarsitillugit ministeriunerup sioraatungaani qanittunnguullugu qeqarpoq. Siullermik inuktitut oqaaseqarpoq:

-Maaniittariaqarpunga, oqarpoq, takusinnaaniassagakkit hr. premierminister, isaatigut toqqarlugu nakkullugu, oqarlungalu inuit ullormik taassuminnga takorluuisut ilagigaannga .. maanna isumalluarnermik ulikkaarpugut .. maanna uagut inuit illit naalakkersuisullu suleqatigissallusi piareerpugut aaqqiissutissanik nutaanik atassuteqaatinillu nutaanik immitsinnut ataqqilluta akisussaassuseqarlutalu nassaarsiornissatsinni.”

Ministeriuneq nikuippoq Mary Simonilu ornillugu, eqillugu uluaatigullu kunillugu .. Tamanna attortinnaqalunilu kusanaqaaq.

Unnukkut Ottawami inuit illuanni nuannanneqarpoq … nipit isumalluarpalupput, oqilisimaarlutik, nuannaarlutillu … tamanna nutaamik aallartinneruvoq, aniguisitaanerulluni …. oqalugiartut arlallit taama oqarput .. ullumikkut aatsaavissuaq Canadamiunngornerput tulluussimaarutigaarput.

Utoqqatsertoqarnissaanut anngussinnaanngitsut aliasupput, kisiannili taamaakkaluartoq ulloq nuannaarnerup ulloraa.