Canadami inuit aliasupput

Nunap inoqqaavisa inuttut pisinnaatitaaffiisa atuutilernissaat Naalagaaffiit Peqatigiit naaggaarpaat.

-Tamanna issittumi nunap inoqqaavinut ajorluinnarpoq, Aqqaluk Lynge, nunap inoqqaavi pillugit Naalagaaffiit Peqatigiit ataatsimiitsitaliarsuani siulittaasup tullia oqarpoq.

Naaggaaqataasunulli ilaasoq tassaavoq issittumi naalagaaffiit ilaat, tassaasoq Canada.

Taassuma itigartitseqataanerata kinguneraa suliap piviusunngortinnissaanut kigaallatsitsineq.

Canadami Kulturimut ilisimatusarnermik ilisimatooq, Marianne Stenbæk, naaggaarnermut tupaallassimaqaaq, Canadamilu inuit aliatsannerat paasilluarsinnaallugu.

- Inuit pakatsisorujussuupput, ukiaq Canadami Inuit Indianerillu naalakkersuisut naaggaarnissaminnut isummersimanerat allanngortinniarlugu suliuteqaraluarput Canadami siornatigut naalakkersuisuusimasut nalunaarummut akuersaartuunikuupput, kisianni naalakkersuisut nutaat, ukioq januaarimi naalakkersuisunngortut, nalunaarummut akerliupput, nalunarporlu suna akerleineraat, tusakkakkali malillugit Inuit Indianerillu pissaaneqarpallaalersinnaanerat naalakkersuisut annilaanngatigigaat pissutaannguatsiarpoq, Marianne Stenbæk oqarpoq.

Kisianni, suunukua Naalagaaffiit Peqatigiit nunap inoqqaavi pillugit ataatsimiititaliamini anguniarai, Naalagaaffiillu Peqatigiit naaggaarsimagai, Aqqaluk Lynge ima oqarpoq:

- Inatsisit tunngaviusut, aamma nunarsuarmioqatigiit inatsisaat malillugit, uagut inuiaat nunasiaatigineqarsimasut immikkut inuiattut akuerisaannginnerput pissutigalugu, taava immikkut inuttut pisinnaatitaaffigut erseqqissarniarsimavavut, tassanilu tassa pingaaruteqarnerpaavoq inuiattut akuerisaanissaq, kiisalu aamma nunamik pigisaqartuujuarnermut aalajangersaanissaq. Taakkuupput tassa aallaaviujuarsimasut uani apeqqummi.